Rriten çmimet sërish, inflacioni arrin në 4.7 përqind
Sipas të dhënave më të fundit nga Agjencia e Statistikave të Kosovës (ASK), indeksi i harmonizuar i çmimeve të konsumit (IHÇK) për muajin shtator 2025 ka shënuar një rritje vjetore prej 4.7%, krahasuar me të njëjtën periudhë të vitit paraprak.
Foto: Ilustrim
Kjo rritje është nxitur kryesisht nga shtrenjtimi i disa kategorive të mallrave dhe shërbimeve, me ndikim të drejtpërdrejtë në koston e jetesës së qytetarëve. Ndër kategoritë që kanë pësuar rritje më të lartë të çmimeve janë:
- Pushimet e organizuara (+23.1%)
- Biletat e fluturimeve (+22.5%)
- Energjia elektrike (+17.4%)
- Kafeja, çaji dhe kakaoja (+14.2%)
- Pemët (+13.0%)
- Mishi (+12.1%)
- Qumështi, djathi dhe vezët (+8.8%)
- Shërbimet hoteliere (+8.3%)
- Vajrat dhe yndyrat (+6.8%)
Këto nëngrupe kanë kontribuar së bashku me 4.9 për qind në rritjen e përgjithshme të indeksit vjetor.
Në anën tjetër, inflacioni mujor ka shënuar një rënie prej -0.2% në krahasim me muajin gusht 2025. Kjo rënie është ndikuar nga uljet e çmimeve në disa kategori, përfshirë:
- Karburantet dhe lubrifikantët për pajisje transporti (-3.6%)
- Pemët (-2.8%)
- Biletat e fluturimeve (-1.6%)
- Energjia elektrike (-1.2%)
Megjithatë, disa kategori kanë shënuar rritje gjatë muajit shtator, si:
- Lëndët djegëse të ngurta (si druri dhe peletët) (+1.4%)
- Qumështi, djathi dhe vezët (+1.1%)
- Blerja e automjeteve (+0.6%)
- Shërbimet hoteliere (+0.4%)
ASK thekson se këto luhatje ndikojnë drejtpërdrejt në normat mujore dhe vjetore të inflacionit, të cilat maten përmes IHÇK-së – një tregues kyç i gjendjes ekonomike dhe kostos së jetesës në vend.
