Tregtia me pakicë në Kosovë rritet për 16,87% në gusht, fondi i pagave shënon rritje prej 25,81%

Sipas publikimit të Statistikave Afatshkurtra të Tregtisë me Pakicë, përjashtuar tregtinë e automjeteve dhe motoçikletave, gjatë kësaj periudhe është shënuar rritje edhe në numrin e të punësuarve dhe fondin e pagave e mëditjeve.

Rritjen më të lartë të qarkullimit, sipas aktiviteteve ekonomike, e ka shënuar tregtia me pakicë e mallrave kulturore dhe të argëtimit në dyqane të specializuara, me 60,96%. Pas saj renditet tregtia me pakicë e pajisjeve informatike dhe të komunikimit, me rritje prej 42,52%, ndërsa tregtia e produkteve ushqimore, pijeve dhe duhanit është rritur për 31,24%.

Rritje të konsiderueshme ka shënuar edhe tregtia me pakicë e karburantit për automjete, me 28,58%, si dhe shitjet përmes internetit, postës, tezgave dhe tregjeve, me 27,20%.

Ndërkohë, i vetmi sektor që ka regjistruar rënie të qarkullimit është tregtia me pakicë e pajisjeve të tjera shtëpiake në dyqane të specializuara, me 1,06%.

Përveç qarkullimit, ASK ka evidentuar rritje prej 6,24% të numrit të të punësuarve në tregtinë me pakicë, krahasuar me gushtin e vitit 2025. Rritja më e madhe e punësimit është regjistruar në tregtinë e mallrave kulturore dhe të argëtimit, me 18,47%, e ndjekur nga tregtia e produkteve ushqimore, pijeve dhe duhanit, me 14,61%.

Një tjetër tregues që ka shënuar rritje është fondi i pagave dhe mëditjeve, i cili në gusht 2026 është rritur për 25,81% krahasuar me të njëjtën periudhë të vitit paraprak.

Rritjen më të lartë të fondit të pagave e ka regjistruar tregtia e produkteve ushqimore, pijeve dhe duhanit, me 47,24%, ndërsa tregtia e mallrave kulturore dhe të argëtimit ka shënuar rritje prej 44,09%.

Të dhënat e ASK-së paraqesin ecurinë e tregtisë me pakicë në Kosovë përmes tre treguesve kryesorë: qarkullimit, punësimit dhe fondit të pagave e mëditjeve.

Tabelat e plota statistikore mund të gjenden në faqen zyrtare të Agjencisë së Statistikave të Kosovës: https://ask.rks-gov.net/Themes/ShortStats.