Osmani: Besojmë se drejtësia ndërkombëtare edhe një herë do ta nxjerrë Kosovën faqebardhë

18.09.2021

Në këtë javë, Gjykata Speciale nisi procesin e parë gjyqësor për krime lufte ndaj ish-pjesëtarit të Ushtrisë Çlirimtare të UÇK-së, Sali Mustafa. Gjithashtu, edhe ish-presidenti i Kosovës, Hashim Thaçi dhe të tjerët nga rangu i lartë në Komandën e UÇK-së po përballen gjithashtu me akuzua si të përfshirë në krime lufte. Presidentja e Kosovës, Vjosa […]

Osmani: Besojmë se drejtësia ndërkombëtare edhe një herë do ta nxjerrë Kosovën faqebardhë Foto: Ilustrim

Në këtë javë, Gjykata Speciale nisi procesin e parë gjyqësor për krime lufte ndaj ish-pjesëtarit të Ushtrisë Çlirimtare të UÇK-së, Sali Mustafa.

Gjithashtu, edhe ish-presidenti i Kosovës, Hashim Thaçi dhe të tjerët nga rangu i lartë në Komandën e UÇK-së po përballen gjithashtu me akuzua si të përfshirë në krime lufte.

Presidentja e Kosovës, Vjosa Osmani në një intervistë për DW ka folur për nisjen e gjykimit të parë në Dhomat e Specializuara në Hagë, që njihen ndryshe edhe si Gjykata Speciale.

Osmani ka thënë se Kosova ka dhënë përkrahjen e saj për këto institucione, gjithnjë duke besuar që drejtësia ndërkombëtare edhe njëherë do ta nxjerrë Kosovën faqebardhë.

“Mendoj që është e domosdoshme që të ketë procese të pavarura, të paanshme dhe në përputhje të plotë me Kushtetutën e Kosovës dhe me ligjet e Kosovës.

Sepse është pikërisht Kushtetuta jonë dhe këto ligje, që e kanë themeluar këtë gjykatë apo Dhomat e Spezializuara, siç njihen dhe janë themeluar, me përkrahjen e madhe të Parlamentit të Kosovës në atë kohë, me më shumë se dy të tretat.

Dhe ky ka qenë një akt ku Kosova ka dëshmuar se, jo vetëm që nuk i frikësohet drejtësisë ndërkombëtare, por bashkëpunon me drejtësinë ndërkombëtare, sepse e vërteta e Kosovës ka ndodhur para syve të të gjithë botës. Ne nuk kemi asgjë për të fshehur dhe nuk lejojmë asesi që këto tendenca për rishkrimin e historisë të shkojnë përpara, sepse asesi nuk mund të pranojmë që të krijohet një barazi morale mes asaj çfarë ka bërë regjimi i Milosheviçit, si sistem i sponsorizuar nga shteti, i cili ka kryer krime lufte, krime kundër njerëzimit dhe gjenocid, dhe çfarë mund të ketë ndodhur me disa individë pas luftës.

Ato asnjëherë nuk kanë qenë veprime institucionale apo të përkrahura nga populli i Kosovës. Në secilin rast, Kosova ka dhënë përkrahjen e saj për këto institucione, gjithnjë duke besuar që drejtësia ndërkombëtare edhe njëherë do ta nxjerrë Kosovën faqebardhë”, ka thënë Osmani.