Ministria e Financave kërkon listën e grevistëve që t’ua ndalojë pagat: Ligji për Greva kërkon pezullimin e kontratës së punës

Nga dita e sotme sektori publik në vendin tonë ka nisur grevën e përgjithshme, kjo pasi që sindikalistët nuk kanë arritur që brenda kësaj periudhe kohore deri më 25 gusht të bien dakord me Qeverinë e Kosovës lidhur me kërkesën e tyre për mbështetje prej 100 euro.

Sekretari i Përgjithshëm i Ministrisë së Financave dhe Transfereve, Enis Spahiu, është deklaruar lidhur me vendimin që sindikalistët të pezullohen nga puna dhe t’u ndalohen benefitet tjera për aq kohë sa janë pjesë e grevës.

Po ashtu, ai ka theksur se kërkesa për listën e personave që janë në grevë, e të cilët duhet të pezullohen nga paga, është ligjore.

“Po është kërkesë ligjore është neni 18 i Ligjit për Greva, paragrafi 1, i cila kërkon që persona që janë në grevë tu pezullohen paga dhe përgjegjësia nga puna. Neni 18 i Ligjit për Greva kërkon pezullimin e kontratës së punë dhe të mos këtë përgjegjësi me punu po ashtu edhe të mos paguhet, vetëm për këtë arsyeje e kemi dërguar emalin”, tha Spahiu.

Ai po ashtu ka bërë të ditur se Ministria s’ka qenë e njoftuar se do fillojë greva, por për këtë janë njoftuar sot.

“Sot e kemi marrë njoftimin për grevë nuk kemi pas më herët njoftim. I kemi shkruar sindikatave dhe i kemi garantuar që nuk e pengojmë grevën vetëm proceduralisht na duhet me ditë kush është në grevë, prej kujt mundemi të kërkojmë punë dhe prej kujt jo. Ne kemi pranuar sot email prej Ali Sefaj dhe ati i kemi kthyer emailin duke i treguar se administrativisht duhet zhvilluar disa procedura pa e penguar procesin e grevës”, tha Spahiu.

Ndryshe, në një email drejtuar anëtarit të këshillit Grevist dhe Përfaqësues i Shoqatave Sindikale të nivelit qendror, Ali Sefaj, Ministria ka kërkuar që të kenë listën e personave që janë në grevë për t’i pezulluar nga puna dhe t’u ndalin benefitet.