Maqedonci: Javelinët pritet të vijnë gjatë vitit 2025, pagesa është bërë për dy këste nga tre sa janë gjithsej

Në një intervistë të dhënë mbrëmë për emisionin “Rubikon” në Klan Kosova, Maqedonci ka konfirmuar se blerja e fundit e armatimit nga ShBA-ja ka ndodhur në muajin tetor.

Një nga pikat kryesore të këtij bashkëpunimi është furnizimi i FSK-së me raketat antitank Javelin, një sistem i avancuar i armëve që do të kontribuojë në rritjen e aftësive mbrojtëse të Kosovës. Sipas ministrit Maqedonci, pagesa për këto raketa është bërë për dy këste nga tre sa janë gjithsej, dhe se procesi i dorëzimit po zhvillohet në përputhje me planifikimet.

“Vlerësoj që gjatë vitit 2025 do të kemi ardhjen e parë të Javelinëve”, deklaroi Maqedonci, duke theksuar se edhe pse pritja e këtyre raketave është e rëndësishme, FSK nuk është në mungesë të sistemeve raketore antitank, pasi që janë bërë blerje të tjera nga Turqia.