Kryeministri i vendit, Albin Kurti, vlerëson se reformimi i Administratës Publike ishte urgjencë pasi raportet vendore e ndërkombëtare tregonin gjendjen e këtij institucione ku duhej reformat ishin të domosdoshme.

“Republika e Kosovës qartazi e ka treguar orientimin dhe politikat e saj shtetërore drejt anëtarësimit në Bashkimin Evropian dhe kemi ndërmarrë barrën e reformimit të sektorëve publikë përfshirë këtu edhe reformimin e Administratës Publike”.

“Faktorët dhe shkaqet që kanë ndikuar në reformimin thelbësor të Administratës Publike kanë variuar ndër vite por në mënyrë konstante kanë mbërthyer urgjencën që Administrata Publike t’i përgjigjet zhvillimit të kohës dhe kontekstit social në vend që të ketë kapacitetet e nevojshme për bartjen e proceseve të anëtarësimit në BE me kohë dhe cilësi.

Në konferencën vjetore “Par Progresi Kosovës 2023” të organizuar nga Grupi për Studime Juridike dhe Politike, Kurti tha se ndër vite raportet ndërkombëtare tregonin mungesë të profesionalizimit në këtë institucion dhe se reformat ishin urgjencë.

Poashtu ai ka thënë se  thënë se gjatë qeverisjes së tij, për herë të parë në Kosovë është bërë unifikimi i pagës në sistemin publik.

Kurti ka thënë se me Ligjin për Paga, që ka hyrë në fuqi në fillim të këtij muaji, dallimi mes pagës më të lartë dhe asaj më të ulët ka rënë në mënyrë drastike.

“Me hyrjen në fuqi të Ligjit për Paga në sektorin publik, në Republikën e Kosovës për herë të parë kemi një sistem të unifikuar të pagës në sistemin publik dhe po mënjanohet pabarazia drastike në pagë çfarë ishte në të kaluarën. Dallimi mes pagës më të lartë dhe asaj më të ulët nga 20 sa ishte dikur tani është zbritur në vetëm 4,70 herë. Kemi rritje të buxhetit për paga prej 105 milionë euro”, ka thënë Kurti.