Kryeministri Kurti në Davos: Do të nënshkruajë marrëveshjen e tregtisë së lirë me EFTA-n

Gjatë qëndrimit në Davos, Kryeministri Kurti do të nënshkruajë Marrëveshjen e Tregtisë së Lirë me vendet anëtare të Shoqatës Evropiane të Tregtisë së Lirë (EFTA), që përfshijnë Norvegjinë, Zvicrën, Lihtenshtajnin dhe Islandën. Kjo marrëveshje shënon një hap të madh përpara në zhvillimin ekonomik të Kosovës.

Kurti ka theksuar se Kosova është i vetmi vend në rajon që ka negociuar me EFTA-n jo vetëm për tregtinë e mallrave, por edhe për atë të shërbimeve.

“Kosova është i vetmi vend në rajon që përveç negocimit për tregtinë e mallrave, ka arritur të negociojë edhe për tregti të shërbimeve me EFTA-n. Kjo marrëveshje do të krijojë mundësi të reja për prodhuesit dhe kompanitë tona vendore, dhe do të forcojë partneritetin ekonomik dhe tregtar ndërmjet Kosovës dhe shteteve të EFTA-s,” ka deklaruar Kryeministri.

Marrëveshja pritet të krijojë një platformë të re për bashkëpunim ekonomik dhe të hapë dyer për eksportet dhe investimet kosovare në këto vende.

Përveç nënshkrimit të marrëveshjes, Kurti do të zhvillojë takime me përfaqësues të shteteve mike dhe partnerëve ndërkombëtarë, si dhe me investitorë potencialë.

Ai gjithashtu do të marrë pjesë në dy panele diskutimi të organizuara në “Shtëpinë e Kosovës” (House of Kosova), një hapësirë e krijuar për herë të parë në këtë forum global. Panele diskutimi ku do të jetë pjesë Kurti përfshijnë:

• “Demokracitë e qëndrueshme në një epokë të ndryshimit”, ku do të flitet për sfidat dhe mundësitë për ruajtjen e demokracive në kohë të pasigurisë.
• “Inteligjenca Artificiale për Njerëzimin: inovacioni etik në epokën e Inteligjencës”, i fokusuar në mënyrat se si mund të shfrytëzohet teknologjia për përfitime njerëzore.

Në këtë forum, krahas Kryeministrit Kurti, po marrin pjesë edhe ministrja e Industrisë, Ndërmarrësisë dhe Tregtisë, Rozeta Hajdari, dhe ministrja e Ekonomisë, Artane Rizvanolli. Pjesëmarrja e tyre thekson përkushtimin e Kosovës për të qenë pjesë e dialogut global mbi zhvillimin ekonomik dhe teknologjik.

Forumi në Davos ofron një mundësi unike për Kosovën që të forcojë lidhjet me partnerë ndërkombëtarë dhe të paraqesë potencialin e saj ekonomik dhe tregtar. Marrëveshja me EFTA-n dhe angazhimi i liderëve kosovarë janë sinjal i qartë i një vizioni të qartë për të ardhmen e vendit.