Këshilli i Prindrëve kërkon që organizatat ndërkombëtare të reagojnë që greva të ndërpritet
30.09.2022 Lajme
Këshilli i Prindërve të Kosovës përmes një postimi në rrjete sociale ka kërkuar që mësimi të fillojë sa më shpejt, kështu duke falënderuar UNICEF për thirrjen që procesi mësimor të nis.
Në reagim, UNICEF ka theksuar se me mos fillimin e vitit të ri shkollor po i bëhet dëm të madh të ardhmes së fëmijëve, duke marrë parasysh edhe pandeminë me COVID-19 që ngadalësoi procesin e mësimit.
“Jemi mirënjohës organizatës UNICEF që ka kërkuar fillimin e menjëhershëm të procesit mësimor në Kosovë, duke sqaruar edhe dëmin e madh që po i bëhet të ardhmes së fëmijëve”, thuhet në njoftim.
Nga Këshilli i Prindërve kanë theksuar se duan që edhe organizatat tjera ndërkombëtare të reagojnë që greva të ndërpritet dhe të nis procesi mësimor.
“Do të donim që reagime të tilla, në mbrojtje të së drejtës kushtetuese të fëmijëve tanë për edukim e arsimim publik, të kishim edhe nga organizata e përfaqësi të tjera ndërkombëtare që zakonisht reagojnë për çështje shumë më pak të rëndësishme”, thuhet tutje në njoftim.
“E 22-ta ditë që rreth 320 mijë fëmijë nuk mund të shkojnë në shkolla! Hapini shkollat ose çregjistrohemi”, thuhet në komunikatën e Këshillit të Prindërve.
Korporata Energjetike e Kosovës (KEK) ka reaguar për grevën e paralajmërimit siç thuhet të ish-punëtorëve të sigurimit fizik.
Sipas KEK-ut nuk bëhet fjalë për ndonjë organizim sindikal nga dy sindikatat aktive të KEK-ut, por për Sindikatën e ish punëtorëve të sigurimit fizik të cilët nuk kanë kontratë me korporatën tash e 19 vite.
“Lidhur me këtë, ju bëjmë me dije se në bazë të dokumentacionit të cilin kemi trashëguar, figuron se njësia “ish Mbrojtja dhe Siguria” ishte ndarë (shthurur) nga KEK-u para 19 viteve (pra në vitin 2004) sipas strategjisë në fuqi të miratuar nga Kuvendi i Kosovës, andaj nga ajo kohë ky shërbim kontraktohet nga kompanitë e licencuara të sigurimit fizik”, thuhet në reagim.
Sipas KEK-ut, për sqarim, procesi i shthurjes së KEK-ut ka filluar në vitin 2004/05, faza e parë, me ndarjen e njësive jo-qenësore (9 njësi jo-qenësore përfshirë edhe shërbimin e sigurisë fizike), duke vazhduar në vitin 2006 me ndarjen e operatorit të sistemit dhe transmisionit (KOSTT) dhe në fund, ndarjen e operatorit të shpërndarjes dhe furnizimit (KEDS/KESCO) në vitin 2013.
“Për më tepër, në bazë të dokumentacionit që posedojmë, asnjë nga ish punëtorët e kësaj ish njësie të shthurur në vitin 2004 nuk kanë kontratë pune me KEK sh.a. Në këto rrethana, nga aspekti ligjor, punëtorët në fjalë nuk kanë asnjë mundësi të figurojnë të jenë punëtorë të subjektit juridik KEK sh.a. pasi që ata kanë kaluar tek kompanitë private para se të regjistrohej KEK sh.a. si korporatë në vitin 2005”, thuhet në komunikatë.
Më tej, KEK sh.a. vlerëson se, Ligji për shërbimet private të sigurisë (Nr. 04/L-004) parasheh që (1) Shërbimet e sigurimit ofrohen vetëm nga kompanitë private të sigurimit, të licencuara dhe të autorizuara në pajtim me këtë ligj, dhe (2) Shërbimet e sigurimit ushtrohen vetëm përmes punëtorëve të licencuar të sigurimit në pajtim me këtë Ligj. Mbi këtë bazë, KEK sh.a. as nuk është i licencuar dhe as që ka mundësi për te aplikuar për licencim.
“Për më tepër çdo punësim i ri i punëtorëve në KEK sh. a. duhet të bëhet në pajtim me Ligjin e Punës dhe aktet tjera nënligjore, si Udhëzimi i MPMS për krijimin e marrëdhënies se punës ne sektorin publik (2011/14) për punësimet e reja. Lidhur me këtë, duke pas parasysh faktet e lartcekura dhe bazuar në ligjet në fuqi, KEK sh.a. nuk ka asnjë mundësi ligjore për ri-organizimin e këtij shërbimi në kuadër të korporatës”, thuhet në njoftim.
Me tej thuhet se pavarësisht të gjithave, menaxhmentet e KEK-ut gjithmonë kanë bashkë ndjerë me situatën e krijuar nga shumë vite më herët, me ç ‘rast duke pasur synim primar sigurinë fizike të objekteve dhe pronës, përkundër kufizimeve të Ligjit të Prokurimit Publik, menaxhmentet gjithmonë kanë inkurajuar të gjithë OE të suksesshëm që janë kontraktuar për sigurim fizik, që asnjë punëtor i ish njësisë Mbrojtja dhe Siguria të mos mbetet pa punë. Përtej kësaj ka caktuar pagën minimale (mbi kushtet e tregut), sigurimin shëndetësorë dhe shujtën.
Të hënën në mëngjes gjatë një proteste në Prishtinë, kryetari i Shoqatës Sindikale “Siguria Fizike” në KEK, Nexhat Murati ka paralajmëruar grevë më datën 13 nëntor.
Kryetari i SBASHK-ut, Rrahman Jasharaj ka adresuar kritika për qeverinë në pushtet.
Sipas tij, përfundimi i gjysmëvjetorit të parë shkollor është në mjegull, derisa kërkon dialog nga ministrja e Arsimit, Arbërie Nagavci, në mënyrë që të qartësohet se kur do të mbyllet saktë gjysmëvjetori i parë.
Jasharaj për KosovaPress nuk e ka mohuar mundësinë për rikthimin e grevës, pasi sipas tij, ajo nuk është e mbyllur. Ai tha se nëse qeveria nuk i mban fjalët për ligjin e pagave do të bisedojnë me anëtarësinë se si duhet të veprojnë.
Më 22 dhjetor Kuvendi do të mblidhet në seancë plenare, për të shqyrtuar në lexim të dytë Projektligjin për pagat në sektorin publik. SBASHK-u ka kërkuar që të merren parasysh kërkesat e tyre.
“Kur pezullohet greva nuk është e mbyllur dhe si e tillë mbetet si mundësi të rikthehet. Ne edhe opinionit ja kemi bërë të ditur se janari është muaji i cili do të vendoset ku tutje. Lajmet që i marrim e që nuk janë zyrtare për ligjin e pagave, sepse ishte edhe ky ligj në të kaluarën, jo vetëm SBASHK-u, por veçmas SBASHK-u dhe sindikatat e tjera i dërgoi në grevë…Më të zgjaturit greva, Nagavci dhe të tjerët nga qeveria, mbase për të ndikuar te grevistët nisën të flasin fjalë të mëdha për ligjin e pagave. Unë besoj se greva ka ndikuar që qeveria ta shpejtojë procesin, ngase fillimisht kishte premtuar në mars, pastaj qershor”.
“Urojmë ky dhjetori të na sjell edhe një lajm të gëzuar, edhe leximin e dytë dhe votimin, dhe uroj që Nagavci dhe deputetët, sidomos të pozitës, ta mbajnë fjalën sepse ata publikisht kanë premtuar se do të hiqet afati tetë muaj pas votimit në gazetën zyrtare, gjitha këto janë nëse ndodhin e janari do të na tregojë… Po u bë një ligj me këto paga që janë, nuk na duhet asgjë, pra çdo gjë varet nga qeveria dhe ne janarin do ta presim me entuziazëm, por edhe me atë sfidën që nëse nuk ndodhin gjërat si duhen”, theksoi Jasharaj.
Ndërsa, sa i përket përfundimit të gjysmëvjetorit të parë shkollor, kryetari i SBASHK-ut ka thënë se ende nuk dihet sakt.
Shoqata Sindikale e Punëtorëve Shëndetësor të QKUK-së ka paralajmëruar ShSKUK-në se në rast se nuk merren parasysh rekomandimet e tyre përmes të cilave tentojnë ta ruajnë mirëqenien e infermierëve, do të mbajë grevë 1 orëshe deri te bojkoti i përgjithshëm i punës.
Përmes një komunikate për media, kjo shoqatë thotë se ndjehet e zhgënjyer me injorimin në vazhdimësi nga SHSKUK/QKUK e cila, siç thuhet më tej, “përkundër proaktivitetit tonë për dialog social, e njëjta refuzon, madje edhe përgjigjet përmes postës elektronike”.
“Bazuar në këtë realitet po e publikojmë kërkesën e radhës drejtuar SHSKUK/QKUK-së, duke e njoftuar publikisht të njëjtën dhe opinionin se në rast se nuk merren parasysh rekomandimet tona përmes të cilave tentojmë ta ruajmë mirëqenien e infermierëve, duke mos i mbingarkuar më tepër me punë, ndërsa edhe duke e pasur prioritet shërbimin cilësor ndaj qytetarëve, Shoqata Sindikale e Punëtorëve Shëndetësor të QKUK-së do ndërmarr veprimin sindikal grevë, duke filluar nga greva 1 ( një ) orëshe deri tek bojkoti i përgjithshëm i punës”, thuhet në komunikatë.
30.09.2022
Lajme
![[FOTO] Vetura përplaset me ujkun në autostradën Prizren-Suharekë](https://www.suharekaonline.com/wp-content/uploads/2022/04/ujku_autostrad.jpg)
