Ish-ministri Mehaj emërohet këshilltar i jashtëm i Kurtit

Këtë e ka bërë të ditur drejtori i Grupit Ballkanik për Politika në Prishtinë, Naim Rashiti.

“Po është këshilltarë i jashtëm si shume të tjerë që kemi për institucione”, ka thënë Rashiti në një përgjigje me shkrim për Dukagjinin.

Portali Dukagjini ka tentuar të kontaktojë me Zyrën e Kryeministrit, por deri më tani nuk ka marrë përgjigje.

Ndërkaq, angazhimi i Mehajt si këshilltar i jashtëm në Qeverinë Kurti është në kuadër të Grupit Ballkanik, e cila implementohet me mbështetjen e Qeverisë së Norvegjisë, në kuadër të kornizës “Zhvillimi i paqes & shtet-ndërtimit dhe avancimi i agjendës Evropiane”.

Ndërsa, ditë më parë ish-ministri Mehaj ka pranuar “Medaljen për Shërbim të Shquar”, nga ministri i Mbrojtjes, Ejup Maqedonci.

Mehaj e kishte bërë të ditur këtë përmes një postimi në rrjetin social në Facebook.

“Jashtëzakonisht i nderuar që në përvjetorin e ditëve më të lavdishme të historisë kombëtare ‘Epopesë së UÇK-së’, të pranoj ‘Medaljen për Shërbim të Shquar’ nga ministri i Mbrojtjes Maqedonci. Në shenjë mirënjohje për kontributin e jashtëzakonshëm për forcimin e subjektivitetit ndërkombëtar të Kosovës si dhe fuqizimin e Ushtrisë së shtetit tonë”, ka shkruar Mehaj.

Ndryshe, Armend Mehaj ka ushtruar detyrën e ministrit të Mbrojtjes mbi dy vite, ku më pas për shkaqe familjare ai kishte dhënë dorëheqje.