Haradinaj-Stublla kërkon nga presidenca gjermane dhe BE-ja heqjen e vizave për Kosovën

Ministrja e Punëve të Jashtme dhe Diasporës, Meliza Haradinaj-Stublla me ftesë të ministrit Federal të Punëve të Jashtme të Gjermanisë, Heiko Maas, ka marrë pjesë në panelin Ministror të Ministrave të Jashtëm të Ballkanit Perëndimor me temë “Të Rinjtë, Migrimi dhe Sfidat Demografike në Ballkanin Perëndimor”, të moderuar nga ministrit gjerman i Shtetit për Evropë, Michael Roth.

“Pata kënaqësinë mbrëmë të jem pjesëmarrëse e panelit Ministror të Ministrave të Jashtëm të Ballkanit Perëndimor me temë “Të Rinjtë, Migrimi dhe Sfidat Demografike në
Ballkanin Perëndimor”, me ftesë të Ministrit Federal të Punëve të Jashtme të Gjermanisë Z. Heiko Maas, nën moderimin e Ministrit Gjerman të Shtetit për Evropë Z. Michael Roth.

Në fjalën time ndava me pjesëmarrësit realitetin e Kosovës si vendi më i ri e me popullsinë më të re në Evropë, dhe i ftova të shfrytëzojmë bashkë potencialin e lartë të Kosovës dhe rinisë së mrekullueshme të saj, duke u bashkuar në iniciativën tonë për të themeluar në Prizren një Qendër Rajonale për Start-up dhe Inovacion” njoftoi Haradinaj-Stublla.

Poashtu, gjatë fjalës së saj, Haradinaj-Stublla theksoi se Ballkani Perëndimor së pari duhet të mirënjoh realitetin brenda vetes dhe më pas të kërkojë integrim të mëtejmë në strukturat eurointegruese.

Shefja e diplomacisë së Kosovës u shpreh se vetëm mbi parimin e barazisë do të mund të ndërtohet e ardhmja e përbashkët, derisa foli edhe për mungesën e liberalizimit të vizave.

“Nuk kisha se si të mos e theksoj mungesën e liberalizimit të vizave për qytetarët e Kosovës, duke kërkuar nga Presidenca Gjermane dhe Bashkimi Evropian veprim strategjik dhe vendosmëri për të përqafuar afër vetes rininë e jashtëzakonshme kosovare”, ka theksuar ministrja.