“Hajde Folim” në Suharekë: Vjosa Osmani dhe Lumir Abdixhiku sot në bashkëbisedim të hapur me qytetarët
Në kuadër të platformës së komunikimit “HAJDE FOLIM”, Lidhja Demokratike e Kosovës (LDK) organizon sot një takim të hapur me qytetarët e Suharekës.
Foto: Ilustrim
Ngjarja do të mbahet në ambientet e Muzeut të Qytetit, duke filluar nga ora 18:00.Ky bashkëbisedim do të jetë i veçantë, pasi pjesëmarrës do të jenë dy figurat kryesore të listës zgjedhore: kandidatja për presidente, Vjosa Osmani, dhe kandidati për kryeministër, Lumir Abdixhiku.
Qëllimi i këtij takimi është krijimi i një hapësire ku qytetarët mund të shprehin drejtpërdrejt idetë, shqetësimet dhe kërkesat e tyre.
Sipas organizatorëve, fokusi do të jetë te vizioni për të ardhmen e vendit dhe rruga e përbashkët drejt zhvillimit dhe stabilitetit.
“Ejani të bashkëbisedojmë për të ardhmen, për vizionin dhe për rrugën që na pret së bashku,” thuhet në ftesën drejtuar qytetarëve suharekas.
Takimi është i hapur për të gjithë dhe përfaqëson një mundësi për të dëgjuar nga afër planet e kandidatëve në një format jo-formal dhe interaktiv.
