Gripi sezonal po rritet me të madhe në Kosovë, simptomat dhe si ta shmangni, flet infektologu Ramadani

IKSHPK ka apeluar të gjithë drejtorët komunal të Shëndetësisë që ta ngrisin nivelin e vigjilencës dhe të raportimit të rasteve të dyshimta në të gjitha institucionet shëndetësore publike dhe private në Kosovë.

IKSHPK ka kërkuar që të vaksinohen të gjithē personat e moshuar, personat me sëmundje kronike dhe personat me imunitet të dobësuar.

“Zyrtarët e Institutit Kombëtar të Shëndetësisë së Kosovës tërheqin vërejtjen se virusi A bën pjesë në grupin e viruseve të gripit të zakonshëm sezonal, por rekomandohet vaksinimi për të gjithē personat e moshuar, personat me sëmundje kronike dhe personat me imunitet të dobësuar”, thuhet në njoftimin e IKSHPK-së.

Infektologu kosovar, Hamdi Ramadani ka theksuar se virusi sezonal është i ngjajshëm me virusin COVID-19.

Pasi që jemi në mesin e pandemisë COVID-19, pacientët vënë pikëpyetje nëse janë të infektuar me COVID-19 apo me grip sezonal.

Infektologu Ramadani ka thënë se një gjë e tillë mund të dihet vetëm përmes analizave laboratorike.

Po ashtu, ai ka shtuar se shihet një fluks më i madh i pacientëve që kanë kërkuar ndihmë në qendrat kryesore të mjekësisë familjare.

“Sipas informacioneve po flitet për një fluks më të madh të sëmurëve me grip sezonal dhe krahasuar me COVID-19 që nuk është aq i pranishëm në Kosovë këto ditë, gripi sezonal është duke domunuar në vendin tonë”, ka thënë ai për IndeksOnline.

Ramadani tregoi se cilat janë simptomat e virusit sezonal.

“Qytetarët duhet të kenë kujdes, simptomat e virusit sezonal janë: temperature e lartë, dhimbja e kokës, humbje të oreksit, dhimbje të nyjeve dhe ato respiratore me kollotje, dhimbje të fytit. Kjo është e ngjajshme me COVID-19 dhe është mirë që fëmijët dhe të moshuarit të vaksinohen kundër COVID-19”, shtoi ai.