Escobar takon krerët e opozitës nga ora 19:00
Emisari amerikan për Ballkanin Perëndimor, Gabriel Escobar, sot do të ketë një takim të përbashkët me liderët opozitarë nga ora 19:00.
Foto: Ilustrim
Zëdhënësi i AAK-së, Kushtrim Xhemaili, ka konfirmuar se kreu i partisë, Ramush Haradinaj, do të jetë në takim dhe se mirëpret angazhimin e SHBA-së për finalizimin e procesit të dialogut.
“E mirëpresim angazhimin e ShBA-së për finalizimin e procesit të dialogut me Serbinë, i cili duhet të përmbyllet me njohje reciproke. Angazhimi i emisarit Escobar është kyç dhe e falënderojmë për gatishmërinë e tij për ta ndihmuar Kosovën në synimet e saj. Kryetari Haradinaj me kënaqësi ka pranuar ftesën për takim sot në ora 19:00”, ka thënë ai.
Po ashtu, në takim do të marrë pjesë edhe kreu i PDK-së, Memli Krasniqi. Burime nga Partia Demokratike të Kosovës kanë bërë të ditur se kryetari i PDK-së, Memli Krasniqi, do të takohet të mërkurën me emisarin amerikan dhe me ambasadorin e SHBA-së në Kosovë, Jeffrey M. Hovenier.
Takimin me zyrtarin e lartë amerikanë e ka konfirmuar edhe kreu i LDK-së, Lumir Abdixhiku.
Escobar aktualisht është në Presidencë për një takim me presidenten Vjosa Osmani. Pas pak pritet të dalin në një deklarim për media.
