E-Kosova tani edhe si aplikacion mobil, mbi 220 shërbime në dispozicion
Kryeministri në detyrë, Albin Kurti ka njoftuar se platforma e-Kosova tashmë është e disponueshme edhe si aplikacion mobil për pajisjet iOS dhe Android.
Kjo zhvillim vjen si një lehtësi e re për qytetarët dhe bizneset, duke u ofruar qasje të thjeshtë dhe të shpejtë në një gamë të gjerë shërbimesh publike.
“Me më shumë se 1 milion përdorues të regjistruar dhe mbi 220 shërbime elektronike të zhvilluara, e-Kosova është dritarja jonë digjitale për qytetarët dhe bizneset,” shkroi Kurti në njoftimin e tij. Ai theksoi se të gjitha shërbimet e ofruara më parë nëpërmjet platformës online tani janë në dispozicion edhe në aplikacionin mobil.
Disa nga shërbimet e shumta që mund të aksesohen nëpërmjet e-Kosova përfshijnë:
- Certifikatat e gjendjes civile
- Certifikatat e pronës dhe kopjet e planit
- Obligimet e tatimit në pronë dhe gjobat në trafik
- Vazhdimi i regjistrimit të veturës
- Certifikata për historinë penale
- Aplikimet për shtesa, benefite, grante dhe subvencione
- Pagesat elektronike
- Raporti kreditor
Kryeministri Kurti theksoi se ky është një hap i rëndësishëm në procesin e digjitalizimit të shërbimeve publike, duke synuar t’u ofrojë qytetarëve dhe bizneseve një përvojë më të mirë dhe më efikase. Ai përfundoi duke thënë: “Vazhdojmë me digjitalizimin për shërbime më të mira për të gjithë.”
