Suhareka dhe Oda e Arkitektëve bashkojnë forcat për “rilindje urbane”, Muharremaj nënshkruan memorandum bashkëpunimi

Ky dokument, i nënshkruar nga kryetari i Komunës, Bali Muharremaj, dhe kryetari i OARK-së, Uran Kyçyku, synon të vendosë bazat për një planifikim hapësinor më të mirë dhe projekte cilësore në të ardhmen.

Kjo marrëveshje, siç bëri të ditur kryetari Muharremaj, do të shfrytëzojë ekspertizën e OARK-së për të siguruar zbatimin e praktikave më të mira në planifikimin hapësinor, arkitekturën dhe zhvillimin urban të qëndrueshëm. Bashkëpunimi parashikon hartimin e planeve strategjike komunale, organizimin e konkurseve profesionale për projektim arkitektonik dhe urban, si dhe hartimin e kritereve profesionale për projekte dhe konkurse publike.

Memorandumi gjithashtu synon të promovojë transparencën dhe profesionalizmin në fushën e arkitekturës dhe urbanizmit, duke zbatuar standarde etike në proceset urbane. Kjo do të ndihmojë në rritjen e cilësisë së projekteve dhe do të përmirësojë cilësinë e jetës për banorët e Suharekës. Për më tepër, do të ofrohet asistencë dhe ekspertizë profesionale sipas nevojës, si dhe do të zhvillohen projekte të përbashkëta që synojnë përmirësimin e infrastrukturës publike.

Muharremaj theksoi se Komuna e Suharekës po avancon vazhdimisht duke ofruar shërbime profesionale, të cilat do të garantojnë zhvillimin dhe zbatimin e projekteve të ardhshme me cilësi të lartë. Nënshkrimi i kësaj marrëveshjeje shënon një angazhim të fortë të Komunës për një qasje më profesionale dhe të orientuar drejt së ardhmes në zhvillimin e qytetit.