Trafik i rënduar sot në Zagreb – Paralajmërim për mërgimtarët që udhëtojnë drejt Kosovës

05.07.2025

Qendra Kombëtare për Menaxhim Kufitar ka shpërndarë një njoftim të rëndësishëm nga autoritetet kroate, që vlen veçanërisht për mërgimtarët shqiptarë që planifikojnë të udhëtojnë drejt Kosovës përmes territorit të Kroacisë.

Në prag të sezonit të verës, shumë bashkatdhetarë janë nisur nga vendet perëndimore për të ardhur në Kosovë. Një nga rrugët më të përdorura kalon përmes Kroacisë dhe qytetit të Zagrebit, i cili këtë fundjavë do të përballet me një ngjarje që pritet të shkaktojë bllokime të mëdha të trafikut.

Koncert gjigant në Zagreb – rreth 500,000 vizitorë

Më 5 korrik 2025, e shtunë, në mbrëmje, në Zagreb do të mbahet një koncert i madh në ajër të hapur, ku pritet të marrin pjesë rreth gjysmë milioni vizitorë nga Kroacia dhe vende të ndryshme. Ngjarja është njoftuar si një ndër më të mëdhatë të këtij viti në Kroaci dhe pritet të ndikojë drejtpërdrejt në qarkullimin rrugor.

Trafiku do të preket në disa ditë:

  • Disa ditë para koncertit, trafiku në hyrje dhe dalje të Zagrebit do të nisë të rëndohet;
  • Ditën e koncertit – më 5 korrik, si dhe natën nga 5 në 6 korrik, priten bllokime të mëdha, rradhë të gjata dhe vonesa serioze;
  • Brenda qytetit të Zagrebit do të ketë ndërprerje të rrugëve dhe rregullore të përkohshme të trafikut nga data 4 deri më 6 korrik 2025.

Cilat rrugë preken?

Autoritetet kroate kanë identifikuar disa autostrada ku pritet ngarkesë e madhe trafiku:

  • A2, A3 dhe A4 – që lidhin Zagreb me Slloveninë, Hungarinë dhe lindjen e Kroacisë;
  • A1 dhe A6 – që vijnë nga jugu i Kroacisë, ku zakonisht kalojnë edhe shumë mërgimtarë që udhëtojnë drejt Kosovës.

Për të gjithë ata që po vijnë nga Gjermania, Zvicra, Austria, Sllovenia apo Italia, dhe kalojnë përmes Kroacisë në rrugëtimin drejt Kosovës, rekomandohet shmangia e kalimit përmes Zagrebit gjatë fundjavës.

Qendra Kombëtare për Menaxhim Kufitar u bën thirrje mërgimtarëve:

  • Të riplanifikojnë udhëtimin, duke shmangur datën 5 korrik për kalim përmes Zagrebit;
  • Nëse është e mundur, të kalojnë Kroacinë një ditë pas koncertit;
  • Të përdorin rrugë alternative, ose të konsultohen me aplikacione për gjendjen e trafikut përpara nisjes;
  • Të qëndrojnë të informuar përmes burimeve zyrtare kroate.

Ku mund të informoheni në kohë reale?

Ky paralajmërim është i rëndësishëm për të shmangur stresin, vonesat dhe bllokimet gjatë udhëtimit tuaj drejt Kosovës.