Tentativë për futje droge në Qendrën Korrektuese të Dubravës, sekuestrohen rreth 2 gramë marihuanë

Kërkesa për konsumim të narkotikëve brenda burgjeve po shtyn persona të ndryshëm të tentojnë futjen e tyre me forma të ndryshme, raporton Gazeta Sinjali.

Një rast i tillë u zbulua së fundmi në Qendrën Korrektuese në Dubravë, ku oficerët korrektues kanë parandaluar një tentim për futje të lëndëve narkotike në hapësirat e brendshme të burgut.

Burime të sigurta të Gazetës Sinjali bëjnë me dije se më 16 qershor 2025, rreth orës 09:30, oficerët korrektues gjatë një kontrolli rutinë në hapësirën mes Pavijonit 3 dhe 4, kanë hasur në një qese të dyshimtë, e cila ishte fshehur në zonën ndërmjet dy blloqeve.

Në qese janë gjetur 5 paketime letre që përmbanin një substancë të dyshuar si marihuanë. Pas peshimit, kjo substancë ka rezultuar të ketë një peshë totale bruto rreth 2 gramë.

Ndonëse ende nuk është identifikuar ndonjë i dyshuar, njësia e Drejtorisë për Hetimin e Trafikut të Narkotikëve (DHTN) – Pejë ka bërë pranimin dhe dorëzimin e provave materiale. Prokurori kujdestar është njoftuar dhe ka urdhëruar iniciimin e rastit si “Posedim i paautorizuar i narkotikëve, substancave psikotrope ose analoge”.

Ky rast thekson sfidën e vazhdueshme me të cilën përballen institucionet korrektuese në parandalimin e futjes së lëndëve narkotike dhe nevojën për masa më të rrepta sigurie.