Suhareka gati për Vetëvendosjen lokale: Hamdi Bytyqi, alternativa e re për kryetar komune

Ky njoftim vjen pas një takimi të rëndësishëm në Suharekë, ku morën pjesë figura kyçe të Lëvizjes, përfshirë Kryeministrin Albin Kurti, Sekretarin Organizativ Alim Rama, koordinatorin e qendrave dhe deputetin Fitore Zyba, Kryetarin e Qendrës në Therandë Jetmir Durmishi, si dhe Sekretarin për media të LV-së, Arlind Manxhuka.

Në njoftimin e tyre, Lëvizja VETËVENDOSJE! thekson se Suhareka është tashmë “gati për të vetëvendosur edhe në nivelin lokal!” dhe se fryma e investimeve të Qeverisë qendrore do të vazhdojë edhe në nivelin komunal. “Garancë për këtë është alternativa qeverisëse lokale e Lëvizjes VETËVENDOSJE! që ka në qendër qytetarin dhe komunitetin,” thuhet në njoftim.

Theksohet gjithashtu rëndësia e bashkëpunimit ndërmjet qeverisë qendrore dhe asaj lokale, duke e cilësuar këtë si “binomin e nevojshëm për të shtyrë përpara projektet aq shumë të nevojshme për të mirën e qytetarëve në Suharekë e kudo në Kosovë.”

Lëvizja VETËVENDOSJE! u bën thirrje të gjithë aktivistëve dhe qytetarëve të Suharekës të angazhohen “çdo ditë, gjithandej lagjeve e fshatrave të Therandës për fitoren e madhe.”

Njoftimi përmbyllet me urime për të gjithë qytetarët e Suharekës dhe aktivistët e Lëvizjes, me shpresën “Na priftë e mbara!”