Specialja: Vendimi për kërkesën e Hashim Thaçit për lirim me kusht do të merret në kohën e duhur
Trupi gjykues i Dhomave të Specializuara të Kosovës në Hagë do të vendosë në kohën e duhur për kërkesën e ish-presidentit Hashim Thaçi për lirim me kusht, kanë bërë të ditur zyrtarë të gjykatës.
Foto: Ilustrim
Zëdhënësi i Dhomave të Specializuara, Michael Doyle, deklaroi për Radio Dukagjinin se vendimi lidhur me kërkesën e mbrojtjes do të merret pasi të shqyrtohen të gjitha rrethanat e paraqitura.
Mbrojtja e Thaçit e ka dorëzuar kërkesën më 6 korrik, duke propozuar një sërë masash që synojnë të garantojnë respektimin e kushteve të lirimit. Mes tyre përfshihet edhe një dorëzani prej 50 mijë eurosh.
Sipas kërkesës, Thaçi zotohet se nuk do të largohet nga territori i Kosovës, do të dorëzojë pasaportën dhe dokumentet e tjera të udhëtimit, si dhe do të përmbahet nga çdo deklaratë publike, qoftë drejtpërdrejt apo tërthorazi, në media dhe rrjetet sociale.
Po ashtu, në kërkesë theksohet se ai nuk do të diskutojë përmbajtjen e çështjes së tij me askënd, përveç anëtarëve të autorizuar të ekipit mbrojtës. Trupi gjykues pritet të vendosë mbi këtë kërkesë brenda një afati të arsyeshëm.
