Kurti në New York: Do të angazhohemi për korrigjimin e verdiktit ndaj ish-krerëve të UÇK-së

19.09.2026

Kryeministri në detyrë i Kosovës, Albin Kurti, ka zhvilluar në New York një bashkëbisedim me të rinjtë e diasporës shqiptare në Amerikë, në kuadër të aktivitetit “Between Here and Home”.

Takimi u organizua nga grupet e të rinjve shqiptaro-amerikanë ZANI, F’Oda dhe Columbia University Albanian Society. Në delegacionin e Kosovës, sipas Kurtit, janë edhe kryetarja e Preshevës, Ardita Sinani, dhe deputeti Shaip Kamberi.

Kurti tha se gjatë takimit u diskutua për zhvillimet ekonomike dhe sociale në Kosovë, përfshirë rritjen ekonomike dhe uljen e papunësisë, ndërsa theksoi edhe nevojën për përmirësimin e mëtejshëm të sistemit gjyqësor.

Një pjesë e diskutimit iu kushtua edhe vendimit të Dhomave të Specializuara ndaj ish-krerëve të UÇK-së. Kurti deklaroi se Qeveria e Kosovës do të ofrojë mbështetje për përpjekjet për kundërshtimin e këtij vendimi në instancat e apelit, si dhe në rrafshin diplomatik.

Ai tha se Kosova do të vazhdojë bashkëpunimin me aleatët ndërkombëtarë dhe angazhimin për mbrojtjen e luftës çlirimtare, si dhe për dokumentimin dhe zbardhjen e masakrave dhe krimeve të kryera nga Serbia në Kosovë.