Bastisje në Dubravë: Sekuestrohen telefona dhe rreth 480 gramë substancë e dyshuar
Shërbimi Korrektues i Kosovës ka njoftuar se është parandaluar një tentim për futjen e sendeve të kundërligjshme në Qendrën Korrektuese të Dubravës.
Foto: Ilustrim
Sipas njoftimit, aksioni është zhvilluar pas informacioneve të siguruara nga Njësia e Inteligjencës Korrektuese (NJIK), në bashkëpunim me Departamentin e Sigurisë së kësaj qendre dhe institucionet tjera të sigurisë.
Gjatë bastisjes së planifikuar, zyrtarët korrektues kanë gjetur dhe sekuestruar gjashtë telefona mobilë, si dhe rreth 480 gramë substancë të dyshuar.
Për rastin është njoftuar Policia e Kosovës, e cila ka marrë materialet e sekuestruara dhe ka nisur veprimet e mëtejshme procedurale. Ndërkohë, Shërbimi Korrektues i Kosovës ka nisur hetimet e brendshme për zbardhjen e plotë të rastit.
SHKK ka bërë të ditur se do të vazhdojë angazhimin në parandalimin e kontrabandës dhe në forcimin e sigurisë brenda institucioneve korrektuese.
