Kuvendi miraton tri projektligje në shqyrtim të parë, diskutohet edhe raporti i Auditorit për vitin 2025

Gjatë seancës, deputetët fillimisht zhvilluan deklarime jashtë rendit të ditës dhe parashtruan pyetje parlamentare, të cilave iu përgjigjën përfaqësues të kabinetit qeveritar.

Me 63 vota për u miratua propozimi për emërimin dhe zëvendësimin e deputetëve në komisionet parlamentare, ndërsa me 78 vota për u miratua edhe fushëveprimi i komisioneve parlamentare për Legjislaturën XI.

Në vijim, ministri i Infrastrukturës dhe Transportit, Dimal Basha, prezantoi Projektligjin për Agjencinë e Menaxhimit të Emergjencave, i cili u miratua në parim me 74 vota për.

Po ashtu, ministri i Bujqësisë, Pylltarisë dhe Zhvillimit Rural, Armend Muja, prezantoi Projektligjin për Regjistrimin e Bujqësisë. Kuvendi miratoi në shqyrtim të parë edhe këtë projektligj, si dhe Projektligjin për Inspektoratin Qendror të Bujqësisë, Sigurisë Ushqimore, Veterinës dhe Pylltarisë.

Një tjetër pikë e rëndësishme e seancës ishte shqyrtimi i Raportit të Auditorit të Përgjithshëm për Raportin vjetor të Auditimit të Buxhetit të Republikës së Kosovës për vitin 2025.

Auditorja e Përgjithshme, Vlora Spanca, gjatë prezantimit të raportit theksoi se ai ofron një vlerësim të pavarur për menaxhimin e fondeve publike, duke përfshirë gjetjet dhe rekomandimet për përmirësimin e raportimit financiar dhe menaxhimit buxhetor në institucionet publike.

Spanca bëri të ditur se rezultatet e auditimit evidentojnë përmirësime në disa fusha, por edhe mangësi që kërkojnë ndërhyrje dhe përgjegjësi më të madhe institucionale.

Ndërkaq, kryetari i Komisionit për Mbikëqyrjen e Financave Publike, Besian Mustafa, paraqiti rekomandimin e komisionit për miratimin e raportit.

Pas diskutimeve të deputetëve nga grupet e ndryshme parlamentare lidhur me gjetjet e auditimit dhe menaxhimin e parasë publike, seanca përfundoi me shterimin e pikave të parapara të rendit të ditës.