IKSHPK apelon për kujdes: Gripi sezonal mund të shkaktojë komplikime serioze shëndetësore

30.12.2025

Instituti Kombëtar i Shëndetit Publik ka bërë të ditur se gripi sezonal është një sëmundje akute infektive, e cila në një numër të konsiderueshëm rastesh mund të shkaktojë komplikime serioze shëndetësore.

Sipas IKSHPK-së, rreziku është më i lartë te fëmijët, të moshuarit si dhe te personat që vuajnë nga sëmundje kronike. Instituti rikujton se parandalimi mbetet forma më e mirë e mbrojtjes nga kjo sëmundje.

Në këtë drejtim, IKSHPK thekson se vaksina kundër gripit sezonal është mënyra më efektive për të reduktuar rrezikun e infektimit dhe për të parandaluar përhapjen e virusit.

Po ashtu, Instituti ka dhënë disa këshilla për mbrojtje nga gripi sezonal, duke rekomanduar që qytetarët të:

Lajnë duart shpesh me ujë dhe sapun

Mbulonin gojën dhe hundën kur kolliten ose teshtijnë

Shmangin kontaktin e ngushtë me persona të sëmurë

Qëndrojnë në shtëpi nëse janë të sëmurë

Ushqehen shëndetshëm dhe të pinë sa më shumë lëngje

Vaksinohen çdo vit kundër gripit sezonal

IKSHPK u bën thirrje qytetarëve që të respektojnë këto masa parandaluese për të mbrojtur shëndetin e tyre dhe të personave përreth.