Ra në kontakt me rrymën derisa po punonte në çati, humb jetën një burrë
Një aksident tragjik ka ndodhur të enjten në fshatin Mirash të Ferizajt, ku një burrë ka humbur jetën pasi ka rënë në kontakt me energjinë elektrike gjatë punimeve në pullazin e shtëpisë së tij.
Rasti është raportuar nga Policia e Kosovës në raportin e saj 24-orësh.
Sipas policisë, viktima – mashkull kosovar – ishte duke punuar në çati kur ka prekur rrymën elektrike, gjë që ka rezultuar në vdekjen e menjëhershme të tij.
“Mjeku ka konstatuar vdekjen e viktimës, ndërsa me kërkesë të familjarëve dhe pas konsultimit me prokurorin, trupi i pajetë u është liruar familjarëve për ceremoni mortore”, thuhet në njoftimin e policisë.
Autoritetet janë duke e trajtuar rastin si aksident tragjik, ndërsa apeluan për kujdes të shtuar gjatë punimeve në vende të rrezikshme dhe pranë linjave elektrike.