Policia sekuestron 10 armë zjarri dhe realizon 346 urdhëresa të gjykatës

03.11.2025

Zyrtarët policorë të rajonit të Prishtinës vazhdojnë të mbajnë një angazhim të lartë në sigurimin e rendit dhe zbatimin e ligjit në të gjithë territorin.

Sipas raportit të fundit, gjatë javës së kaluar janë realizuar gjithsej 346 urdhëresa të gjykatës, prej të cilave 53 për vepra penale, ndërsa pjesa tjetër për kundërvajtje, seanca, verifikime dhe procedura të tjera policore.

Pas përfundimit të procedurave përkatëse, personat e dënuar me burgim janë dërguar për vuajtje të dënimit, ndërsa ata që kanë marrë gjobë janë liruar pasi kanë kryer obligimet e caktuara në urdhëresa.

Aktivitetet policore nuk kanë përfshirë vetëm zbatimin e urdhërave të gjykatës. Njësitet e sigurisë kanë kryer kontrolle të ndryshme, duke rezultuar me sekuestrimin e 10 armëve të zjarrit të llojeve dhe kalibrave të ndryshëm.

Gjithashtu, gjatë kësaj periudhe, janë shqiptuar gjithsej 4,854 masa administrative për kundërvajtje të ndryshme dhe shkelje të kodit rrugor. Prej tyre, 311 janë evidentuar nga vetura inteligjente dhe radari mobil, duke treguar fokusin e Policisë në kontrollin e qarkullimit rrugor dhe sigurinë e qytetarëve.

Policia e Rajonit të Prishtinës rithekson angazhimin e saj të vazhdueshëm për të ruajtur rendin dhe sigurinë publike dhe fton qytetarët të respektojnë ligjet në fuqi për të kontribuar në një mjedis më të sigurt për të gjithë.