Krimi i organizuar dhe korrupsioni, prioritet i Prokurorisë së Kosovës gjatë vitit 2024
Sot është mbajtur Konferenca Vjetore e Prokurorëve në Kosovë, ku u prezantuan rezultatet e punës së Prokurorit të Shtetit për vitin 2024 dhe nëntëmujorin e këtij viti. Të dhënat tregojnë një rritje të ndjeshme të efikasitetit në trajtimin e rasteve penale dhe një avancim të dukshëm në sundimin e ligjit në vend.
Sipas raporteve të sistemit prokurorial të cilat i prezentoi u.d. Kryeprokurorit të Shtetit, z. Besim Kelmendi, gjatë vitit 2024 janë pranuar 50,681 kallëzime-lëndë penale, ndërsa janë zgjidhur 45,481 raste, ose 90% e tyre. Krahasuar me vitin 2023, ku norma e zgjidhjes ishte 81%, kjo tregon një ngritje të ndjeshme të performancës. Departamentet e Krimeve të Rënda kanë arritur një sukses të veçantë, duke zgjidhur 95% të rasteve, krahasuar me 89% në vitin paraprak.
Një fokus i veçantë është kushtuar rasteve të korrupsionit dhe krimit ekonomik. Gjatë vitit 2024 janë pranuar kallëzime penale ndaj 2,554 personave dhe janë zgjidhur 1,836 prej tyre, ose 75%. Për nëntëmujorin e vitit 2025, janë zgjidhur 648 raste korrupsioni me 1,173 persona dhe 267 raste të krimit ekonomik me 332 persona, duke treguar përkushtim të vazhdueshëm në këtë fushë.
Prokurori i Shtetit ka raportuar gjithashtu arritje në trajtimin e krimit të organizuar, krimeve të luftës, terrorizmit dhe rasteve të dhunës në familje. Gjatë vitit 2024, janë zgjidhur 18 raste të krimit të organizuar me 207 persona, 27 raste të krimeve të luftës me 90.91% të tyre të pranuara, 45 raste terrorizmi me 92 persona dhe 4,083 raste dhune në familje me 5,330 persona.
Një sukses i veçantë është shënuar edhe në fushën e ngrirjes dhe konfiskimit të pasurive të përfituara nga veprat penale. Vlera e pasurisë së ngrirë dhe të sekuestruar gjatë vitit 2024 ishte 48,299,297.86 €, ndërsa vlera përfundimtare e konfiskimeve nga gjykata ishte 2,035,057.60 €. Zyra për Rikthim të Aseteve ka ofruar mbështetje të konsiderueshme për rastet e konfiskimit, duke bashkëpunuar me partnerët ndërkombëtarë.
Prokurori i Shtetit ka vënë theks të veçantë edhe në procedurat alternative të trajtimit të rasteve, duke zgjidhur 2,952 raste me 4,344 persona gjatë vitit 2024 dhe 2,671 raste me 4,331 persona gjatë nëntëmujorit të vitit 2025. Ndërkohë, vendimet e gjykatave për vitin 2024 tregojnë se 13,117 persona kanë marrë vendime fajësuese, ndërsa për nëntëmujorin e këtij viti, 8,808 persona janë dënuar ose trajtuar me masa detyrimi.
Në fjalën e tij, Kryeprokurori i Shtetit theksoi se bashkëpunimi i ngushtë me institucionet ligjzbatuese, shoqërinë civile dhe partnerët ndërkombëtarë është kyç për përballimin e krimeve të rënda dhe të atyre ndërkufitare. Ai gjithashtu bëri thirrje për veprim proaktiv në luftën kundër korrupsionit të nivelit të lartë, duke nënvizuar rëndësinë e integritetit, vendosmërisë dhe transparencës.
Konferenca vjetore vjen si një mundësi për të reflektuar mbi arritjet e sistemit prokurorial, por edhe për të identifikuar fushat ku duhet intensifikuar puna, duke garantuar drejtësi të barabartë për të gjithë qytetarët e Kosovës.