Hetimi tronditës: Miliona euro nga Zvicra dyshohet se u transferuan ilegalisht në Kosovë dhe Shqipëri

Në qendër të këtij skandali ndodhet një sistem informal bankar i njohur si “Hawala”, i përdorur nga një klan kriminal shqiptar për pastrimin e parave të drogës. Hetimi, i udhëhequr nga Prokuroria Speciale e Shqipërisë (SPAK), ka vënë në shënjestër një agjenci udhëtimesh në Lucernë si pikën kyçe të këtij rrjeti, shkruan urgjent.com.

Sipas të dhënave të publikuara nga gazetat zvicerane CH Media, klani kriminal ka operuar për vite me radhë duke përdorur agjencinë e udhëtimeve si bazë për aktivitetet e tyre ilegale. Skema, e ndërtuar mbi besimin dhe sistemin Hawala, funksiononte pa lënë gjurmë zyrtare:

Pika e nisjes: Një person në Lucernë, që dëshironte të dërgonte para në Shqipëri apo Kosovë, i dorëzonte paratë kesh një ndërmjetësi të quajtur hawaladar (në këtë rast, agjencia e udhëtimeve).

Kodi sekret: Hawaladari i jepte dërguesit një kod numerik. Dërguesi ia komunikonte këtë kod marrësit në vendin e destinacionit.

Transferta e fshehtë: Në të njëjtën kohë, hawaladari i Lucernës kontaktonte një partnerin e tij në Shqipëri, i cili, pasi merrte kodin, i jepte paratë marrësit, shpesh brenda ditës dhe pa kërkuar asnjë dokument identifikimi.

Ky sistem shmang plotësisht bankat dhe rrugët zyrtare financiare, duke e bërë jashtëzakonisht të vështirë gjurmimin e transaksioneve nga autoritetet.

Hetimet e koordinuara nga Prokuroria Federale Zvicerane dhe SPAK kanë çuar në veprime të rëndësishme. Shtatorin e kaluar, në Zvicër u arrestuan gjashtë të dyshuar për pastrim parash, trafik droge dhe përkatësi në një organizatë kriminale. Katër prej tyre ishin të lidhur direkt me agjencinë e udhëtimeve, ndërsa një i pestë shërbente si korrier parash.

Në Shqipëri, SPAK ka sekuestruar dy prona dhe shuma të mëdha parash nga dy bosë të dyshuar, me pretendimin se këto asete janë përfituar nga veprimtari kriminale.

Autoritetet hetimore kanë arritur të zbulojnë këtë skemë mashtruese pas muajsh të tërë mbikëqyrjeje intensive. Kamerat e sigurisë rreth agjencisë së udhëtimeve në Lucernë kapën vazhdimisht korrierë që merrnin ose dorëzonin shuma të mëdha parash kesh. Përgjimet e bisedave telefonike dhe audio zbuluan detaje të mëtejshme rreth flukseve të parave, orareve të transfertave dhe përdorimit të agjencisë si qendër e operacioneve. Këto prova incriminuese ishin thelbësore për të nxjerrë në dritë veprimtarinë kriminale të këtij klani.