Suhareka, shembull i transformimit të mundshëm: Haradinaj shtron platformën e AAK-së për zhvillim të mëtejshëm

Nën udhëheqjen e kryetarit të komunës, Bali Muharremaj, Suhareka, pa mbështetjen e duhur nga qeveria qendrore, është shndërruar në një qendër të zhvillimit ekonomik.

“Suhareka është një shembull i qartë se çfarë mund të arrijmë kur kemi një vizion të qartë dhe bashkëpunojmë ngushtë me sektorin privat”, theksoi Haradinaj.

Kandidatët e AAK-së për Kuvendin e Kosovës nga Suhareka

Sot, në këtë tubim, u paraqitën edhe pesë kandidatët e AAK-së për Kuvendin e Kosovës nga Suhareka: Bali Muharremaj, Albana Bytyqi, Kymete Bajraktari, Driton Maliqaj dhe Mensur Selimaj. Haradinaj i përshëndeti këta kandidatë, duke theksuar se ata përfaqësojnë zotimin e tyre për zhvillim të mëtejshëm të komunës dhe të vendit.

“Projekte të mëdha si ujëmbledhësi i Dragaqinës, përfundimi i stadiumit dhe ndërtimi i ngrohtores qendrore do të sigurojnë infrastrukturë moderne dhe kushte më të mira jetese për qytetarët e Suharekës”, tha Haradinaj.

Platforma e AAK-së: Rritje pagash, pensione dhe anëtarësim në NATO

Haradinaj shfrytëzoi rastin për të paraqitur pjesë të platformës së AAK-së për zgjedhjet e ardhshme. Ai theksoi se me përfaqësues të AAK-së në Kuvend, do të realizohet një program që përfshihet rritja e pagave dhe pensioneve.

“Në bashkëveprim me SHBA-të dhe aleatët tanë strategjikë, do të sigurojmë anëtarësimin direkt në NATO, do të forcojmë ushtrinë dhe do të garantojmë sundimin e ligjit”, deklaroi Haradinaj.

Suksesi i Suharekës, një model për të gjithë vendin

Duke përmbledhur fjalimin e tij, Haradinaj theksoi se Suhareka ka treguar se transformimi është i mundur. “Tani është koha që këtë sukses ta shtrijmë në mbarë vendin duke e bërë gjithë Kosovën fituese”, përfundoi ai.