Me BODRUM a pa BODRUM? Bodrumi që ekziston vetëm në letra! Aktakuza e Prokurorisë për shkollën e Tërrnjes
Me 26 korrik të vitit 2018, Komuna e Suharekës kishte hapur një ritender për ndërtimin e shkollës fillore të mesme të ulët “Vaso Pashë Shkodrani” me paralele në fshatin Tërrnje.
Tenderi ishte shpallur me numrin e prokurimit 624-18-5519-5-2-1 dhe kishte të bënte me realizimin e një objekti arsimor të rëndësishëm për fshatin Tërrnje. Pas procedurave të tenderimit, më 6 shtator 2018, Komuna shpalli fitues grupin e operatorëve ekonomikë NNP I. NNP & E. nga Suhareka, me një ofertë të dorëzuar në vlerën prej 294,154.79 euro. Ky vendim hapi rrugën për fillimin e ndërtimit të shkollës së re që pritej të përfundonte brenda afateve të parashikuara dhe sipas standardeve të kontratës.
Gjatë muajve të parë pas nënshkrimit të kontratës, punimet nisën në terren dhe u caktuan mbikëqyrës të brendshëm nga komuna si dhe një mbikëqyrës i jashtëm i kontraktuar, të cilët kishin për detyrë të siguronin që çdo fazë e ndërtimit të kryhej sipas projektit dhe rregullave të prokurimit publik. Megjithatë, gjatë periudhës që nga tetori i vitit 2018 e deri në fund të dhjetorit të vitit 2019, sipas aktakuzës së ngritur nga Prokuroria Themelore në Prizren, janë shënuar shkelje serioze.
Më 8 maj 2025, Prokuroria ngriti aktakuzë kundër shtatë personave të përfshirë në këtë projekt. Personat e pandehur janë të identifikuar me inicialet B.K., A.R., V.K., Z.T., A.E., H.B. dhe A.T., të cilët akuzohen për veprën penale “Keqpërdorimi i pozitës apo autoritetit zyrtar” sipas nenit 414 paragrafi 2-1 në lidhje me nenin 31 të Kodit Penal të Republikës së Kosovës. Prokuroria pretendon se të akuzuarit, duke qenë zyrtarë përgjegjës për kontrollimin e punëve ndërtimore në shkollën “Vaso Pashë Shkodrani” në Tërrnje, nuk i kanë përmbushur detyrat e tyre dhe me veprimet e tyre kanë mundësuar përfitime të kundërligjshme për operatorin ekonomik.

Në bazë të dosjes, menaxheri i projektit B.K. kishte ndryshuar projektin e ndërtimit pa përfshirë kompaninë projektuese, duke pranuar punë që binin ndesh me kontratën e nënshkruar dhe me udhëzuesin operativ të prokurimit publik. Dy mbikëqyrësit e brendshëm të komunës, A.R. dhe V.K., ashtu si edhe mbikëqyrësi i jashtëm Z.T., nuk kishin kryer mbikëqyrjen sipas përgjegjësive që u takonin, duke mos vepruar sipas kushteve të kontratës. Ndërkohë, tre anëtarët e komisionit të kontrollimit, A.E., H.B. dhe A.T., kishin dështuar të verifikonin sasitë, cilësinë dhe vlerën financiare të punëve të raportuara, duke pranuar pagesa edhe për pozicione të cilat nuk ishin kryer fare.
Një nga pikat më të rënda të aktakuzës lidhet me bodrumin e shkollës. Sipas projektit të miratuar, objekti duhej të kishte një bodrum me sipërfaqe prej 175 metrash katrorë. Në praktikë, është ndërtuar vetëm një aneks i vogël prej 16 metrash katrorë. Megjithatë, dokumentet e siguruara tregojnë se janë bërë pagesa të plota për një sërë punimesh të lidhura me bodrumin.
Në përshkrimin e çmimeve figurojnë pagesa për betonimin e pllakës mbi bodrum me volum prej 152.2 metrash kub, për ndërtimin e mureve të bodrumit me beton të armuar në volum prej 77.3 metrash kub, për hidroizolim vertikal të mureve të bodrumit në sipërfaqe prej 155 metrash katrorë, për muratimin e mureve me blloqe betoni në volum prej 10 dhe 22 metrash kub, për suvatimin e mureve në sipërfaqe prej 468 metrash katrorë total, për dyshemenë me beton “FER” në sipërfaqe prej 48 metrash katrorë, si dhe për punime të ujësjellësit, kanalizimit dhe instalimeve elektrike që lidhen me bodrumin. Disa nga pozicionet janë paraqitur si të realizuara dhe të paguara, megjithëse bodrumi i plotë nuk ekziston në terren sipas projektit origjinal.


Përveç kësaj, me të njëjtin operator ekonomik ishte lidhur edhe një kontratë për punë shtesë në vlerë prej 29,202.60 euro, gjë që sipas Prokurorisë ka shkaktuar një dëm të dyfishtë për buxhetin e Komunës së Suharekës. Nga njëra anë janë paguar punë të papërfunduara ose të realizuara në mënyrë të pjesshme, e nga ana tjetër janë shtuar edhe pagesa të tjera për punime të reja.
Në përfundim të hetimeve, Prokuroria ka konkluduar se të gjithë të pandehurit, secili në rolin e vet, kanë lejuar që ky projekt të devijojë nga kontrata e nënshkruar dhe kanë kontribuar në krijimin e një dëmi financiar të konsiderueshëm për buxhetin komunal. Me ngritjen e aktakuzës, Prokuroria i ka propozuar gjykatës që pas shqyrtimit gjyqësor dhe administrimit të provave, të gjithë të pandehurit të shpallen fajtorë dhe të dënohen sipas ligjit.

Rasti i ndërtimit të shkollës “Vaso Pashë Shkodrani” në Tërnje paraqet një shembull kronologjik se si një proces prokurimi publik, i nisur në korrik të vitit 2018 me shpalljen e tenderit dhe me shpalljen e fituesit në shtator të po atij viti, ka vazhduar me punime në terren që nisën në tetor 2018, për t’u shoqëruar më pas me shkelje të shumta dhe me abuzime të dyshuara deri në dhjetor 2019. Pas një periudhe prej gati shtatë vitesh, në maj të vitit 2025, ky proces ka rezultuar me ngritjen e aktakuzës ndaj shtatë personave të përfshirë, duke hedhur dritë mbi një skandal të mundshëm të keqpërdorimit të pozitës zyrtare dhe dëmit financiar ndaj buxhetit të Komunës së Suharekës.
