Erjon Kastrati dhe Trepça drejt ndarjes pas tre vitesh, flitet për rikthim te Ylli

Kontrata trevjeçare e nënshkruar në vitin 2022 po i vjen fundi.

Kastrati u transferua te Trepça si një nga transferimet më të bujshme në historinë e basketbollit kosovar, duke ardhur si një lojtar elitë që i kishte dhuruar dy tituj kampioni KB Yllit para kësaj lëvizjeje. Megjithatë, periudha e tij te Trepça nuk ishte ajo e pritura, me Kastratin që luajti më pak se ç’pritej.

Trepça i kishte ofruar kohë më parë Kastratit vazhdimin e bashkëpunimit, por lojtari po shqyrton mundësinë e ndryshimit të ambientit dhe energjisë, me synimin për të rigjetur formën e tij më të mirë në një kohë kur po i afrohet të 30-ave, një moshë delikate për sportistët. Tashmë pritet vetëm formalizimi i ndarjes nga të dyja palët pas përfundimit të kontratës.

Lajmi për ndarjen e mundshme është konfirmuar për mediat në Kosovë nga drejtues të Trepçës. Sipas burimeve të SuharekaOnline, Erjon Kastrati është në bisedime me ish-klubin e tij, Yllin, por ai ka edhe oferta të tjera që po i shqyrton aktualisht.

Rikthimi i mundshëm i Kastratit te Ylli do të ishte një lëvizje interesante në tregun e transferimeve të basketbollit kosovar.