Trepça apo Peja, sonte mësohet kampioni i Kosovës në basketboll

Sonte do të mësohet emri i kampionit të Kosovës në basketboll për sezonin 2022/23.

Trepça dhe Peja do ta zhvillojnë ndeshjen e pestë finale të “play-offit” të Superligës në palestrën e sporteve “Minatori” në Mitrovicë.

Interesimi i tifozëve për ta përcjellë këtë ndeshe të madhe është i jashtëzakonshëm, ndërsa për momentin seria finale është 2-2 pasi të dyja ekipet i fituan nga dy ndeshje në shtëpi.

Skuadrat do ta kërkojnë trofeun e më të mirit në Kosovë për herë të parë pas një dekade.

“Xehetarët” fituan në shtëpi 94:86 dhe 97:90, kurse Verdhezinjtë 107:79 e 87:83.

E sot, duke filluar nga ora 20:00 na pret një ndeshje e zjarrtë dhe një atmosferë e pabesueshme në Mitrovicë.

Pas ndeshjes do të shpallet edhe MVP i finales.

Mitrovicasit për herë të fundit ishin shpallur kampionë më 2012, kurse pejanët një vit më vonë, më 2013.

Në këtë edicion mitrovicasit e fituan Kupën e Kosovës, kurse pejanët ishin finalistë të Ligës Ballkanike.

Për të depërtuar deri në finale, Trepça i kishte eliminuar Bashkimin dhe Sigal Prishtinën, ndërsa Peja e eliminoi Golden Eagle Yllin. /Gazeta Express/