Kosova përballet sonte me Armeninë, test i rëndësishëm për “Dardanët” drejt Botërorit 2026

Ndeshja do të luhet në stadiumin “Fadil Vokrri” dhe do të transmetohet drejtpërdrejt në RTK, duke filluar nga ora 19:00.

Kjo miqësore konsiderohet një mundësi e mirë për trajnerin Foda që të shohë në aksion lojtarë të rinj dhe të testojë formacionet e ndryshme para sfidave të kualifikueseve për Botërorin 2026. Foda shprehu optimizëm për përballjen, duke theksuar rëndësinë e krijimit të një grupi solid dhe të balancuar.

“Kjo ndeshje është një mundësi për të konsoliduar lojën tonë dhe për të rritur harmoninë në skuadër. Armenia është një kundërshtar serioz dhe do të jetë një provë e mirë për ne”, ka thënë Foda.

Në këtë sfidë pritet të marrin minuta edhe disa lojtarë të rinj që janë grumbulluar për herë të parë. Kosova, e cila po përgatitet për një cikël të ri kualifikues, kërkon të gjejë formën më të mirë dhe të krijojë vazhdimësi në rezultatet pozitive. Përballja me Armeninë shihet si një mundësi për të fituar besim dhe për të testuar alternativa të reja në çdo repart.

Pas kësaj ndeshjeje, Kosova do të luajë një tjetër miqësore pas tri ditësh, përsëri në “Fadil Vokrri”, këtë herë kundër Ishujve Komore. Këto miqësore janë thelbësore për “Dardanët” që të hyjnë në formën më të mirë të mundshme në ndeshjet kualifikuese të shtatorit.