Slloveni, shkolla dërgoi ftesa në gjuhën shqipe, reagime se përbën kërcënim për sovranitetin e Sllovenisë
Një njoftim i dërguar prindërve në gjuhën shqipe nga Shkolla Fillore “Žalec” në Slloveni u bë viral dhe solli reagime të forta në opinion dhe në politikë.
Foto: Ilustrim
Fotografia e ftesës, e hartuar në gjuhën shqipe dhe sllovene, u interpretua nga disa si shkelje e rolit të gjuhës zyrtare në institucione publike. Deputetë të partisë konservatore NSi e cilësuan këtë si rrezik për identitetin kombëtar slloven, ndërsa shkolla dha një sqarim të detajuar mbi arsyet e këtij njoftimi.
Drejtoresha e shkollës, Andreja Špajzer, shpjegoi se ftesa nuk ishte për të gjithë prindërit, por ekskluzivisht për ata që nuk flasin gjuhën sllovene dhe vijnë nga familje shqipfolëse. Shkolla kishte vënë re se shumë prindër emigrantë nuk po merrnin pjesë në takimet hyrëse prindër-mësues, ku jepen informacione të rëndësishme për sigurinë, mbarëvajtjen dhe procesin mësimor. Për këtë arsye, më 14 tetor 2025 u organizua një takim shtesë vetëm për komunitetin shqipfolës, me përkthyese të angazhuar posaçërisht. Drejtoria theksoi se të gjitha njoftimet zyrtare për të gjithë prindërit dërgohen vetëm në gjuhën sllovene, ndërsa përkthimi në shqip ishte i natyrës informuese, për të siguruar pjesëmarrjen dhe kuptueshmërinë.
Sipas të dhënave të shkollës, pothuajse një e pesta e nxënësve janë nga familje emigrantësh, ndërsa 13.5 përqind janë shqiptarë. Shkolla thekson se për prindërit e komuniteteve të tjera që flasin gjuhë të rajonit, si serbisht dhe kroatisht, përdoren përkthime informale nga stafi, por nuk përkthehen njoftimet zyrtare. Qëllimi, siç thuhet, nuk është privilegjimi i askujt, por ofrimi i mundësive të barabarta për integrimin e fëmijëve në procesin arsimor.
Reagimet më të ashpra erdhën nga deputeti i NSi-së, Aleksander Reberšek, i cili deklaroi se përdorimi i gjuhëve të tjera në komunikimin zyrtar përbën kërcënim për sovranitetin e Sllovenisë. Ai e quajti këtë rast “shembull të një politike të dështuar të integrimit dhe emigracionit”, duke kërkuar mbledhje urgjente parlamentare për këtë çështje.
Nga ana tjetër, shkolla e Žalecit thotë se po vepron në përputhje me udhëzimet shtetërore për integrimin e fëmijëve të prejardhjeve të ndryshme gjuhësore dhe kulturore. Në reagimin e saj thuhet se takimet e tilla janë zhvilluar prej vitesh dhe janë treguar të domosdoshme për të lehtësuar komunikimin mes prindërve dhe shkollës, duke ndihmuar fëmijët emigrantë të përshtaten më shpejt dhe më me sukses.
Ngjarja ka nxitur një debat më të gjerë në shoqërinë sllovene lidhur me rolin e emigrantëve dhe ruajtjen e gjuhës zyrtare, mes frikës nga humbja e identitetit kombëtar dhe nevojës për integrim të suksesshëm të komuniteteve të reja.
