Rama i kundërpërgjigjet TikTok-ut: “Në Shqipëri vendosin shqiptarët jo pronarët e algoritmit të TikTokut!”
Kryeministri Edi Rama ka dhënë një përgjigje të ashpër ndaj kërkesës së TikTok-ut për “sqarime urgjente” lidhje me vendimin për të ndaluar platformën në Shqipëri për një vit.
Në një reagim të publikuar në platformën X, Rama theksoi se vendimi për të ndaluar TikTok-un nuk ishte i nxituar, por përkundrazi ishte rezultat i një konsultimi të gjatë me prindërit në të gjithë vendin.
“TikTok-u nuk ka çfarë sqarimesh të kërkojë nga Shqipëria, sepse në Shqipëri vendosin shqiptarët jo pronarët e algoritmit të TikTok-ut,” shkruan Rama.
Kryeministri shqiptar e cilësoi platformën si një kërcënim serioz për fëmijët dhe rininë, duke theksuar se vendimi për të ndaluar TikTok-un është marrë për të mbrojtur shëndetin e tyre.
“Të thuash se vrasja e nxënësit adoleshent s’ka lidhje me TikTok-un, sepse konflikti nuk qenka gjeneruar nga Tik Toku do të thotë të mos kesh kuptuar as seriozitetin e kërcënimit që ajo plaftormë ka sjellë për fëmijët dhe rininë e kësaj kohe,” shtoi Rama.
Rama theksoi se vendimi për të ndaluar TikTok-un ka pasur mbështetjen e mbi 90% të prindërve shqiptarë.
“Fortlumturisht Shqipëria është një vend demokratik, ku kur mbi 90% e prindërve kërkojnë ndalimin e TikTok-ut dhe kur shumica dërmuese beson se shëndeti i fëmijëve tanë nuk mund t’i shërbejë platformës, po platforma duhet t’i shërbejë shëndetit të fëmijëve tanë, atëherë vendimi ynë nuk ka se si të jetë më i qartë: Ose vetë Tik Tok-u duhet t’i mbrojë fëmijët e Shqipërisë ose Shqipëria do t’i mbrojë fëmijët e vet nga TikTok-u,” shkruan Rama.