“Ta pres kryt me thikë” – 21 vjeçarja kërcënohet nga ish-burri 26 vjeçar, policia nis hetimet
Numri i rasteve të dhunës në familje në Kosovë ka marrë përmasa shqetësuese, ku viktimat kryesisht janë gratë dhe vajzat që përjetojnë dhunë psikike e fizike, kryesisht nga partnerët ose ish-partnerët e tyre.
Një incident i tillë ka ndodhur dje pasdite në Pejë, ku një grua ka raportuar në Polici se është kanosur nga ish-bashkëshorti i saj. Ngjarja ndodhi rreth orës 16:30, në rrugën “Bekim Berisha”.
Detajet e ngjarjes
Viktima, V. N., rreth 21-vjeçare, ka njoftuar Policinë për problemet me ish-bashkëshortin e saj, të dyshuarin E. G., 26-vjeçar. Një patrullë policore ka shkuar menjëherë në lokacion, në lokalin “Nana”, ku janë takuar viktima dhe dëshmitarja R. N., rreth 20-vjeçare. Të dyja janë shoqëruar në Stacionin Policor në Pejë për intervistim.
Sipas deklarimeve të viktimës, i dyshuari u afrua tek tavolina ku ajo po rrinte me dëshmitaren dhe filloi të bërtiste, duke kërkuar fillimisht që dëshmitarja të largohej. Më pas, ai e detyroi viktimën të ndiqte, duke e kërcënuar se do t’ia priste kokën me thikë nëse nuk e bënte.
Dëshmitarja ka konfirmuar kërcënimet dhe ka shtuar se i dyshuari e ka paralajmëruar edhe atë se “mund ta pësojë edhe ajo”, ndërsa tentonte të nxirrte viktimën jashtë lokalit.
Kur viktima u ngrit për të ikur, i kërkoi dëshmitares të thërriste Policinë, ndërsa i dyshuari u largua nga vendi i ngjarjes. Më vonë, ai u paraqit vetë në polici për intervistim.
Hetimet dhe veprimet e autoriteteve
Rasti është raportuar tek Prokurori kujdestar i Shtetit, i cili ka udhëzuar të iniciohet procedura për veprën penale “Dhunë në familje”. Policia po vazhdon hetimet për të dokumentuar dhe ndjekur penalisht të dyshuarin.
Ngjarja e djeshme në Pejë rikthen vëmendjen te problemi i dhunës në familje në vend, duke nënvizuar nevojën për masa më të forta për mbrojtjen e viktimave dhe ndërhyrjen e shpejtë të institucioneve.