Policia sekuestron një pushkë ajrore në shtëpinë e të dyshuarit pas publikimit të fotove me armë

10.12.2025

Policia e Kosovës ka kryer një bastisje në shtëpinë e një burri në Novobërdë, pas publikimit të fotove me armë në rrjete sociale.

Sipas raportit 24-orësh të Policisë, rasti ka ndodhur rreth orës 18:20 në fshatin Llabjan. Autoritetet kanë vepruar në konsultim me prokurorin dhe gjatë kontrollit në shtëpinë e të dyshuarit është gjetur dhe sekuestruar një pushkë ajrore.

“Me vendim të prokurorit, rasti vazhdon të trajtohet në procedurë të rregullt,” thuhet në raportin policor.

Policia ka theksuar rëndësinë e respektimit të ligjit për armët dhe paralajmëron se çdo rast i mbajtjes apo publikimit të armëve pa leje do të trajtohet me përpikëri.