Një i mitur tenton ta vrasë me thikë bashkëmoshatarin – përfundon në prangat e policisë
Një ngjarje e rëndë ka ndodhur mbrëmjen e së premtes në Ferizaj, ku një i mitur është arrestuar nga Policia e Kosovës nën dyshimin për vrasje në tentativë.
Sipas raportit 24-orësh të Policisë së Kosovës, rasti ka ndodhur në rrugën “Driton Islami” rreth orës 19:50 të datës 24 tetor 2025. Policia ka bërë të ditur se pas një mosmarrëveshjeje, i dyshuari – mashkull kosovar, i mitur – ka therur me thikë viktimën, gjithashtu mashkull kosovar.
Viktima është dërguar me urgjencë në Qendrën Klinike Universitare të Kosovës (QKUK) në Prishtinë, ku po merr trajtimin e nevojshëm mjekësor.
Ndërkohë, pas ndërhyrjes së menjëhershme të njësive policore, i dyshuari është arrestuar dhe me urdhër të prokurorit të rastit është dërguar në mbajtje, ndërsa hetimet lidhur me motivet dhe rrethanat e plota të ngjarjes po vazhdojnë.
Policia e Kosovës ka bërë të ditur se është duke punuar në ndriçimin e plotë të rastit, ndërsa ka apeluar për qetësi dhe për shmangien e veprimeve të dhunshme, sidomos mes të miturve.
