Kryetari i Sindikatës së Policisë u suspendua, dyshohet se incizoi pa autorizim kolegët

10.05.2024

Inspektorati Policor i Kosovës njoftoi më herët se ka rekomanduar suspendimin e një togeri policor, nën dyshimin se i njëjti ka fotografuar dhe bërë incizime të paautorizuara.

Kryetari i Sindikatës së Policisë u suspendua, dyshohet se incizoi pa autorizim kolegët Foto: Ilustrim

Sipas burimeve thuhet se personi në fjalë është kryetari i Sindikatës së Policisë, Imer Zeqiri.

Ekziston dyshimi se Zeqiri ka incizuat pa autorizim kolegët e tij të zyrës.

“Inspektorati Policor i Kosovës respektivisht Departamenti i Hetimeve përmes Linjës së Kaltër (numrit të telefonit pa pagesë 080003333) ka pranuar sot një informacion nga Policia e Kosovës lidhur me dyshimet se nga një toger policor është kryer vepra penale “Fotografimi dhe incizimet tjera të paautorizuara”.

Pas pranimit të informacionit hetuesit e IPK-së kanë dalë në vendin e ngjarjes ku dyshohet se është kryer vepra penale respektivisht në zyrat e Sindikatës së Policisë së Kosovës. Zyrtarët e IPK-së kanë kontaktuar me Prokurorin kompetent duke ndërmarrë veprime konkrete hetimore së bashku edhe me njësi relevante të Policisë së Kosovës”, thuhet në njoftimin e IPK-së.