Gjetje e mbetjeve skeletore të personit të zhdukur gjatë luftës në Rahovec

18.12.2025

Njësitë policore nga Sektori për Hetimin e Personave të Zhdukur gjatë Luftës, në bashkëpunim me Institutin e Mjekësisë Ligjore, kanë kryer një urdhëresë hetimore në Rahovec, ku gjatë gërmimit (eksumimit) janë gjetur mbetje eshtërore që dyshohet se i përkasin të paktën një personi të zhdukur gjatë viteve 1998–1999.

Mbetjet eshtërore janë tërhequr nga vendi i ngjarjes dhe dërguar në Institutin e Mjekësisë Ligjore për ekzaminime mjeko-ligjore, me qëllim identifikimin e personit dhe sqarimin e rrethanave të vdekjes.

Policia e Kosovës konfirmon se hetimet do të vazhdojnë në koordinim me autoritetet përkatëse, me qëllim zbardhjen e plotë të këtij rasti dhe ofrimin e drejtësisë për familjet e të zhdukurve.

Ky operacion nënvizon përkushtimin e institucioneve për të hetuar rastet e personave të zhdukur gjatë luftës dhe për të siguruar përgjegjësinë e plotë për tragjeditë e së kaluarës.