Aksion policor në Mitrovicë, prokuroria kërkon paraburgim për tetë të arrestuarit

20.03.2025

Prokuroria Themelore në Mitrovicë ka kërkuar nga Gjykata Themelore në Mitrovicë caktimin e paraburgimit për tetë personat e arrestuar në aksionin e gjerë policor të zhvilluar në 21 lokacione në rajonin e Mitrovicës. Aksioni, i cili u realizua më 19 mars, rezultoi me sekuestrimin e një arsenali armësh dhe municionesh.

Sipas njoftimit të prokurorisë, gjatë aksionit u sekuestruan:

  • 9 armë zjarri
  • 200 fishekë
  • Municione të ndryshme
  • 15 telefona celularë
  • 2 palë pranga
  • Një thikë
  • Tyta armësh
  • Fatrolla për armë
  • 1 DVR

Prokuroria ka ngritur akuza të ndryshme ndaj të arrestuarve. Për të pandehurit B.H., I.P., dhe O.B., është paraqitur kërkesë për caktimin e paraburgimit për shkak të dyshimit se në bashkëkryerje kanë kryer veprat penale “Detyrimi” dhe “Importi, eksporti, furnizimi, transportimi, prodhimi, këmbimi, ndërmjetësimi ose shitje e paautorizuar e armëve apo material plasëse”.

Ndërsa, për të pandehurit A.S., T.R., A.B., Sh.S., dhe N.R., është paraqitur kërkesë për caktimin e paraburgimit për shkak të dyshimit se kanë kryer veprën penale “Importi, eksporti, furnizimi, transportimi, prodhimi, këmbimi, ndërmjetësimi ose shitje e paautorizuar e armëve apo material plasëse”.

Seanca për caktimin e paraburgimit për tetë të akuzuarit do të mbahet ditën e sotme, më 20 mars 2025.