Aksion i Policisë së Kosovës dhe Gjermanisë, shkatrrohet rrjeti ndërkombëtar i mashtrimeve në internet

Oficerë të policisë nga Augsburgu, Gjermani, udhëtuan në Kosovë për të bashkëpunuar me autoritetet vendase në një aksion të përbashkët kundër këtij rrjeti kriminal.

Sipas Policisë Kriminale të Augsburgut, të martën u bastisën 14 prona në Prishtinë dhe Ferizaj, ku morën pjesë mbi 100 oficerë policie. Gjatë këtij operacioni, 20 persona u arrestuan përkohësisht, ndërsa u zbuluan tri qendra të thirrjeve të lidhura me aktivitetin kriminal.

Hetimet kanë zbuluar se rrjeti kriminal mashtronte investitorët përmes platformave të rreme tregtare në internet, të cilat premtuan fitime të larta. Viktimat, të joshura nga këto premtime, investonin shuma të mëdha parash, të cilat nuk investoheshin kurrë, por përfundonin në xhepat e mashtruesve.

Sipas Prokurorisë Publike të Bambergut, grupi kriminal ka operuar mbi 20 platforma të tilla që nga viti 2017, me emra si Banqoin, OptionFX dhe TradoFX. Aktualisht janë identifikuar rreth 350 viktima vetëm në Gjermani, dhe dëmi i shkaktuar përllogaritet të jetë në shifra dyshifrore miliona eurosh. Një rast i veçantë përfshin një investitor nga North Rhine-Westphalia, i cili humbi pothuajse 1.9 milionë euro brenda nëntë muajve.

Ky operacion është rezultat i një hetimi të gjerë që filloi në pranverën e vitit 2023. Policia gjermane ka bashkëpunuar ngushtë me autoritetet kosovare për të identifikuar të dyshuarit dhe për të lokalizuar qendrat e thirrjeve që shërbenin si bërthama e mashtrimeve.

Policia konfirmon se hetimet po vazhdojnë në të dy vendet për të zbardhur tërësisht përmasat e këtij rrjeti mashtrimi. “Ky aksion i koordinuar tregon rëndësinë e bashkëpunimit ndërkombëtar në luftën kundër krimit kibernetik,” tha një zëdhënës i Prokurorisë Publike të Bambergut.