Aksion i Policisë në Veri: Bastisen qendrat për punë pociale të dyshuara për manipulime zgjedhore

Kjo vjen pas arrestimit të katër zyrtarëve të këtyre qendrave, të cilët dyshohet se kanë shantazhuar qytetarët duke kushtëzuar ndihmat sociale me votën e tyre në favor të një partie të caktuar politike.

Zëvendësdrejtori i Policisë së Kosovës për rajonin e veriut të Mitrovicës, Veton Elshani, ka konfirmuar për Telegrafin se bastisjet janë pjesë e hetimeve që lidhen me arrestimet e 8 shkurtit, një ditë para zgjedhjeve parlamentare.

Sipas Elshanit, zyrtarët e arrestuar dyshohet se kanë funksionuar në struktura paralele/ilegale dhe kanë thirrur qytetarë të ndryshëm në telefon, duke i kërcënuar se do t’u tërhiqen ndihmat sociale nëse nuk votojnë për partinë e caktuar.

“Këta zyrtarë të qendrës për punë sociale, e cila ishte në strukturë paralele/ilegale, dyshohet se kanë thirrur qytetarë të ndryshëm në telefon dhe nën formën e kërcënimit i kanë detyruar apo udhëzuar se si të votojnë, duke i kushtëzuar ndihmat sociale me votën e tyre në favor të një partie të caktuar politike, e cila ishte në garë për zgjedhjet parlamentare në Kosovë”, ka thënë Elshani.

Ai ka shtuar se Prokuroria Themelore në Mitrovicë ka aprovuar kërkesën e Policisë për kontrollin e këtyre qendrave me qëllim të zbulimit të provave që do të vërtetojnë mënyrën e veprimit të këtij aktiviteti të kundërligjshëm, që cilësohet si falsifikim i dokumenteve.

Deri më tani, dy qendra janë mbyllur, ndërsa dy të tjera janë në proces. Pas përfundimit të kontrolleve, Policia do të njoftojë Prokurorinë me të gjeturat, e cila më pas do të vendosë për hapat e mëtejshëm.