Rasti “Agrokosova & QMI vs. AKP” përfundon në arbitrazh, shteti shpenzon 1.5 milionë euro për mbrojtje ligjore

Bëhet fjalë për rastin “Agrokosova Holding dhe QMI kundër Agjencisë Kosovare të Privatizimit (AKP)”.

Fillimisht Ministria e Drejtësisë ka zotuar 2 milionë euro për këtë procedurë të prokurimit, ku nga tre operatorë ekonomik, kompania me seli në Vienë është shpallur fituese.

Konflikti ka fillesën në vendimin e AKP-së për të tërhequr aksionet dhe për të vendosur nën administrim të drejtpërdrejtë ndërmarrjen AgroKosova Holding, e njohur më parë si Ndërmarrja Bujqësore Industriale (NBI) Suhareka. Sipas AKP-së, kjo ndërmarrje ishte privatizuar më 27 gusht 2007 nga blerësit “Gruppo Vinicolo Fantinel” dhe “QMI”.

AKP arsyeton vendimin e saj me mospërmbushjen e zotimeve të marrëveshjes së privatizimit dhe me shkelje të rënda të kushteve të kontratës nga ana e blerësve. Për këtë arsye, agjencia thotë se është detyruar të marrë kontrollin e drejtpërdrejtë të ndërmarrjes.

Megjithatë, përfaqësuesit e AgroKosova Holding nuk janë pajtuar me këtë vendim dhe e kanë dërguar çështjen në arbitrazh ndërkombëtar, duke kërkuar drejtësi për atë që ata e konsiderojnë si veprim të padrejtë nga ana e AKP-së.

Ky nuk është rasti i parë i këtij lloji që përfundon në arbitrazh. Një situatë e ngjashme ka ndodhur edhe me kompaninë “Suhareka Verari sh.p.k & Prorena kundër Republikës së Kosovës”. Edhe në këtë rast, pala e pakënaqur ka zgjedhur rrugën e arbitrazhit për të kërkuar zgjidhje.