Policia e Kosovës brenda 24 ore ka arrestuar 29 persona të dyshuar, tre në Prizren

Policia e Kosovës çdo ditë përballet me raste të ndryshme të cilat raportohen nga qytetarët, e ku në shumicën e rasteve ata përballen edhe me të dyshuarit të cilët kryejnë vepra të ndryshme penale.

Gjatë ditës së mërkurë Policia e Kosovës bën të ditur se ka arrestuar 29 persona, shkruan SuharekaOnline.

Poashtu, në 24 orëshin e fundit policia njofton se 20 persona të dyshuar janë dërguar në mbajtje dhe 6 të tjetër në vuajtje të dënimit.

Raporti i policisë përmbanë edhe arsyet e arrestimeve të personave të dyshuar për vepra të ndryshme penale.

Policia e Kosovës në Prizren ka njoftuar se gjatë ditës së mërkurë ka arrestuar 3 persona të dyshuar për vepra të ndryshme penale si: vjedhje, lëndim i lehtë trupor dhe një tjetër i kërkuar nga gjykata.

“VJEDHJE Rr. Tranzit i Ri, Prizren 25.01.2023 – 23:30. Është arrestuar i dyshuari mashkull kosovar pasi që është hasur duke vjedhur tavolina. Tavolinat janë gjetur në veturën të cilën i dyshuari e kishte në shfrytëzim. Në lidhje me rastin është konsultuar prokurori i shtetit, me vendim të së cilit i dyshuari pas intervistimit është dërguar në mbajtje.

LËNDIM I LEHTË TRUPOR Rr. Shote Galica, Prizren 24.01.2023 – 20:30. Me 25.01.2023 lidhur me rastin është identifikuar dhe arrestuar i dyshuari mashkull kosovar, nën dyshimin e bazuar se ka kryer veprën e lartcekur. Me vendim të prokurorit i dyshuari është dërguar në mbajtje.

ARRESTIM I PERSONIT TË KËRKUAR PKK Vërmicë 25.01.2023 – 18:10. Në bazë të urdhëresës së lëshuar nga gjykata, është arrestuar i dyshuari-kërkuari  mashkull kosovar dhe i njëjti është dërguar në vuajtje të dënimit.” thuhet në njoftimin e policisë.