Sot vendosen gurthemelet e dy urave mbi lumin Ibër në Mitrovicë

Ceremonia do të nisë në orën 17:00 në Mitrovicën e Veriut, në afërsi të objektit të komunës, ku do të vendoset gurthemeli i urës për kalim të veturave. Më pas, në orën 17:15, është planifikuar ecja e përbashkët drejt lokacionit të dytë, ndërsa në orën 17:30 do të bëhet vendosja e gurthemelit të urës për kalimin e këmbësorëve, përballë kopshtit të fëmijëve “Gëzimi ynë” në Mitrovicën e Jugut.

Në këtë ngjarje pritet të marrin pjesë kryeministri në detyrë i Republikës së Kosovës, Albin Kurti, kryetari i Komunës së Mitrovicës së Veriut, Erden Atiq, nënkryetari i Komunës së Mitrovicës së Jugut, Arian Tahiri, ministri në detyrë i Administrimit të Pushtetit Lokal dhe kryesues i Bordit të Përbashkët të dy komunave, Elbert Krasniqi, si dhe ministri në detyrë i Mjedisit, Planifikimit Hapësinor dhe Infrastrukturës, Liburn Aliu.

Pas vendosjes së gurthemelit të urës për kalimin e këmbësorëve, është paraparë edhe një prononcim i përbashkët për media nga zyrtarët pjesëmarrës.

Sipas Lëvizjes Vetëvendosje, ndërtimi i këtyre dy urave ka për qëllim lehtësimin e qarkullimit dhe forcimin e lidhjes mes pjesës jugore dhe asaj veriore të qytetit të Mitrovicës.