Sistemi i ri i hyrje/daljeve në BE: Çfarë duhet të dinë udhëtarët?
Një sistem i ri, thelbësor, i njohur si Sistemi i Hyrje/Daljeve (EES), i dakordësuar fillimisht në vitin 2017, pritet të revolucionarizojë mënyrën se si udhëtarët nga vendet jo-anëtare të BE-së hyjnë dhe dalin nga Zona Shengen.
Edhe pse fillimisht ishte planifikuar të hynte në fuqi në nëntor të vitit të kaluar, zbatimi i tij u shty në minutën e fundit pasi disa shtete anëtare nuk ishin ende gati.
EES është një sistem i automatizuar që do të regjistrojë me saktësi datat e hyrjes dhe daljes së vizitorëve, duke monitoruar tejkalimet e kohës së lejuar të qëndrimit dhe hyrjet e refuzuara. Përveç kësaj, vizitorëve në Zonën Shengen do t’u mblidhen edhe të dhëna biometrike, si imazhe të fytyrës dhe gjurmë gishtash, në pikat e hyrjes.
Përse ky ndryshim?
Qëllimi kryesor i këtij sistemi, sipas Parlamentit Evropian, është përmirësimi i sigurisë, përshpejtimi i procesit të kontrollit kufitar dhe zvogëlimi i radhëve. Nëpërmjet automatizimit dhe mbledhjes së të dhënave biometrike, BE-ja synon të krijojë një sistem më efikas dhe të sigurt për menaxhimin e kufijve.
Shqetësime për zbatimin
Megjithatë, jo të gjithë janë optimistë për një tranzicion të qetë. Disa kanë shprehur frikën se një zbatim i nxituar mund të çojë në kohë më të gjata pritjeje, veçanërisht për ata që udhëtojnë drejt Evropës me trena, tragete dhe aeroplanë. Kryebashkiaku i Londrës, Sadiq Khan, paralajmëroi vitin e kaluar se ky sistem mund të shkaktojë “kaos” në qendrën hekurudhore Eurostar, stacionin St Pancras, duke pasur parasysh fluksin e madh të udhëtarëve.
Në të njëjtën kohë, Mbretëria e Bashkuar, e cila u largua nga Bashkimi Evropian në vitin 2020, këtë vit ka lançuar lejen e saj dixhitale të udhëtimit, e cila tashmë është e detyrueshme për vizitorët evropianë.
Zbatimi hap pas hapi
Sipas vendimit të miratuar nga ligjvënësit evropianë në Strasburg, me 572 vota pro dhe 42 kundër, skema e BE-së do të zbatohet gjatë një periudhe gjashtëmujore. Data e saktë e fillimit do të caktohet nga Komisioni Evropian pasi ligji të miratohet zyrtarisht dhe të hyjë në fuqi.
Shtetet anëtare do të jenë përgjegjëse për përshpejtimin e funksionimit të sistemit EES. Brenda tre muajsh nga hyrja në fuqi, sistemi duhet të jetë funksional në gjysmën e pikave të kalimit kufitar, dhe brenda gjashtë muajsh, vendet duhet të jenë në gjendje të regjistrojnë të gjithë individët që përdorin sistemin.
EES shënon një ndryshim të rëndësishëm në politikat e menaxhimit të kufijve të BE-së. Udhëtarët dhe operatorët e transportit do të duhet të përshtaten me këto rregulla të reja për të siguruar një udhëtim të qetë drejt dhe nga Zona Shengen.
