Qeveria obligon lokalet e gastronomisë të shërbejnë ujë nga çezma

Lokalet e gastronomisë po ashtu duhet që të pajisen me certifikatë të cilësisë së ujit nga Instituti Kombëtar i Shëndetësisë Publike të Kosovës (IKSHPK) dhe ta ekspozojnë të njëjtën në lokale.

Ministri i Shëndetësisë, Rifat Latifi prezantoi para kabinetit qeveritar standardet normative për cilësinë e ujit për konsum për ta mbrojtur shëndetin e njerëzve.

Me këtë vendim, për bizneset e gastronomisë vendosen rregulla në shërbimin e ujit për klientët.

“Me qëllim që të vendosim standardet normaltive për cilësinë ujit të destinuar për konsum njerëzor…. propozoj aprovimin e vendimit që: në rastet kur objektet e gastronomisë furnizohen nga ujësjellësi publik, pronari i biznesit nuk mund t’i ndalojë klientët të shërbehen me ujë rubineti”, tha Latifi.

“Në rastet kur objekti i gastronomisë pretendohet se furnizohet nga uji i puseve, pronari i objektit obligohet të hartojë dhe zbatojë planin e monitorimit operacional të cilësisë së ujit dhe të pajiset me certifikatë të cilësisë së ujit nga IKSHPK-ja dhe këtë certifikatë ta ekspozojë në lokal”, tha ai.

Ky propozim nga ministri i MSH-së u miratua unanimisht nga kabineti i Qeverisë së Kosovës.