Pas aksidentit tragjik në Kroaci, Avokati i Popullit kërkon nga autoritetet të monitorojnë zbatimin e ligjeve

Pas aksidentit tragjik që ka ndodhur në ditën e djeshme në Kroaci, Avokati i Popullit ka kërkuar nga autoritetet e Kosovës që të merren seriozisht me monitorimin e zbatimit të ligjeve përkatëse, e në veçanti të Ligjit të Punës dhe Ligjit për Sigurinë dhe Shëndetin në punë.

Po ashtu Avokati i Popullit ka theksuar se i kanë përcjellë zbatimin e ligjeve përkatëse që kanë të bëjnë me kushtet e punës, sigurinë dhe shëndetin në punë, për çfarë edhe kanë hapur hetime sipas detyrës zyrtare dhe se do të dalin me konstatime dhe rekomandime konkrete për autoritetet përkatëse.

“Avokati i Popullit i Republikës së Kosovës u ka shprehur ngushëllime më të përzemërta familjarëve të viktimave të aksidentit tragjik në Sllavonski Brod, Kroaci dhe njëherësh i uron shërim të shpejtë bashkatdhetarëve tanë të lënduar në këtë aksident.

Me këtë rast, Avokati i Popullit i shprehë mirënjohje autoriteteve të Republikës së Kroacisë për reagim të shpejtë dhe vënien në dispozicion të resurseve dhe kapaciteteve të saj në trajtimin e të lënduarve dhe të mbijetuarve nga ky aksident tragjik.

Është koha e solidarizimit me bashkatdhetarët tanë të përfshirë në këtë aksident dhe me familjet e tyre. Avokati i Popullit u bën thirrje autoriteteve kompetente të Republikës së Kosovës që seriozisht të merren me monitorimin e zbatimit të ligjeve përkatëse, në veçanti të Ligjit të Punës dhe Ligjit për Sigurinë dhe Shëndetin në Punë”, është thënë në një njoftim për media.