Osmani pas takimit me Baker: Mbështetja e SHBA-së forcon sigurinë dhe zhvillimin e Kosovës
Presidentja e Republikës së Kosovës, Vjosa Osmani, ka pritur sot në takim Zëvendësndihmës Sekretarin e Mbrojtjes të Shteteve të Bashkuara të Amerikës, David A. Baker, me të cilin ka diskutuar për thellimin e bashkëpunimit dypalësh në fushën e sigurisë dhe mbrojtjes.
Pas takimit, Osmani ka shpërndarë një postim në Facebook, ku ka theksuar rëndësinë e partneritetit strategjik me Shtetet e Bashkuara të Amerikës. Ajo ka deklaruar se mbështetja amerikane është jetike për sigurinë, forcimin dhe zhvillimin e Kosovës.
“Kur Amerika qëndron përkrah nesh, Kosova është më e fortë, më e sigurt dhe më e zhvilluar,” ka shkruar Presidentja Osmani.
Ajo ka theksuar përkushtimin e Kosovës për të thelluar bashkëpunimin me SHBA-në në fushën e mbrojtjes, përfshirë zhvillimin e industrisë së mbrojtjes, si një mundësi me përfitime të ndërsjella për të dyja vendet.
Gjithashtu, Osmani ka nënvizuar se anëtarësimi i Kosovës në NATO mbetet një objektiv strategjik, ndërsa mbështetja e Shteteve të Bashkuara në këtë drejtim është thelbësore.
Ky takim përforcon edhe një herë angazhimin e ndërsjellë për stabilitet dhe siguri në rajon, si dhe avancimin e pozitës ndërkombëtare të Kosovës.
