Kurti rizgjidhet kryetar i LVV-së, mori afro 99 për qind të votave nga anëtarët e partisë

26.09.2022

Albin Kurti do të vazhdoj edhe për një mandat 4-vjeçar të jetë kryetar i Lëvizjes Vetëvendosje (LVV). Lëvizja Vetëvendosje gjatë ditës së djeshme ka mbajtur zgjedhjet e brendshme, ku Kurti ka arritur që të fitojë 98,60% të votave. Ndërkaq, kundër ishin 0,98% të votave, kurse 0,51% abstenuan. Një gjë të tillë e ka bërë të […]

Albin Kurti do të vazhdoj edhe për një mandat 4-vjeçar të jetë kryetar i Lëvizjes Vetëvendosje (LVV).

Lëvizja Vetëvendosje gjatë ditës së djeshme ka mbajtur zgjedhjet e brendshme, ku Kurti ka arritur që të fitojë 98,60% të votave.

Ndërkaq, kundër ishin 0,98% të votave, kurse 0,51% abstenuan.

Një gjë të tillë e ka bërë të ditur subjekti politik, Lëvizja Vetëvendosje përmes një njoftimi në rrjetet sociale.

“Përgjatë javëve në vijim, procesi do të vazhdojë me zgjedhjen e kryesive të qendrave, e do të përfundojë në fund të muajit Tetor me zgjedhjen e kryesisë së LVV në mbledhjen konstituive të Këshillit të Përgjithshëm.

Në këtë proces të gjatë janë strukturuar gjithsej 485 pika në 29 qendra të Lëvizjes Vetëvendosje. Në këto zgjedhje për herë të parë u votua edhe për strukturat e organizatës Gratë për Vetëvendosje dhe Rinia për Vetëvendosje”, thuhet në njoftim.

Po ashtu, është bërë e ditur se për kryetare të organizatës Gratë për Vetëvendosje është votuar Albulena Haxhiu me 94.55% të votave për, ndërkaq kundër kanë qenë 2.81% të votave dhe abstenim 2.64%.

Komisioni Zgjedhor i Përgjithshëm ka falënduar të gjithë aktivistët e përfshirë në menaxhimin dhe administrimin e zgjedhjeve të brendshme të Lëvizjes VETËVENDOSJE!, për përkushtimin e tyre në mbarëvajtjen e këtij procesi, si dhe falënderuar të gjithë anëtarët që kanë shprehur sot të lirë vullnetin e tyre mbi të ardhmen e organizatës.

“I jemi gjithashtu mirënjohës stafit të Komisionit Qendror Zgjedhor të Republikës së Kosovës dhe të Komisioneve Komunale Zgjedhore, për asistencën dhe materialet e votimit të vëna në dispozicion anekënd Kosovës për zhvillimin e procesit të zgjedhjeve të brendshme të Lëvizjes VETËVENDOSJE!”, thuhet në njoftim.